Այսօր՝ ապրիլի 30-ին, Վրաստանի խորհրդարանում, Բյուրոյի նիստին և խորհրդարանի լիագումար նիստին զուգահեռ, ընդդեմ «գործակալների մասին օրենքի» երկու բողոքի ցույց կանցկացվի:
Առաջինն արդեն մեկնարկել է ժամը 12։00-ին խորհրդարանի հետնամասում, իսկ 19։00-ին՝ խորհրդարանի դիմաց կընթանա:
«Ապրիլի 30-ին՝ ժամը 19:00-ին, խորհրդարանի դիմաց կրկին բողոքելու ենք ռուսական օրենքի դեմ։ Ռուսական օրենքը մեզ բաժանում է Եվրոպայից: Վրաստանի քաղաքացիների հստակ արտահայտված կամքը՝ Եվրամիության լիիրավ անդամ դառնալու հստակ արտահայտված կամքը, պետք է պաշտպանված լինի։ Ռուսական օրենքի նախագծի երկրորդ ընթերցումը կարող է անցկացվել ապրիլի 30-ին, մայիսի 1-ին, մայիսի 2-ին կամ մայիսի 3-ին։
Մեկ օրում մեկնարկած երկրորդ նիստը, ամենայն հավանականությամբ, կտեղափոխվի հաջորդ օր՝ քվեարկության համար։ Այսպիսով, 30-ից սկսելու ենք բողոքել օրենքի երկրորդ ընթերցմամբ ընդունման դեմ։ Վրաստանի քաղաքացիներ, եկեք միասին կանգնենք և կանխենք Վրաստանի ռուսացումը: Իշխանությանը ցույց տանք, որ իշխանությունը մեր մեջ է, իշխանությունը ժողովրդի մեջ է, մեզ պետք է լսեն։ Ո՛չ ռուսական օրենքին»,- ասված է կազմակերպիչների հայտարարության մեջ։
Բողոքի ակցիայի կազմակերպիչներն են «Տալղա», «Մծվանեեբի», «Ջիուտի», «Կարի» և «Ուսանողները եվրոպական ապագայի համար» շարժումները։
Ընդգծենք՝ շուրջ 9 ժամ տևած խորհրդակցությունից հետո իրավական հարցերի հանձնաժողովը լիագումար նիստում երեկ միաձայն կողմ է արտահայտվել «գործակալների մասին» օրենքի երկրորդ ընթերցմանը։
Հիշեցնենք, որ 10 օրից ավելի է ընդդեմ «ռուսական օրենքի» լայնամասշտաբ բողոքի ցույցեր են ընթացել: Ցուցարարների նկատմամբ «պղպեղի սփրեյ» և արցունքաբեր գազ են կիրառել: Հատուկջոկատայիններն ու ոստիկանական տարբեր խմբերը բռնի ուժով ցրել են ցույցերը:
