Ամերիկյան հետազոտական կազմակերպության՝ «Ատլանտյան խորհուրդ»-ի հետազոտողներ Էթո Բուզիաշվիլիի և Սոփո Գելավայի անձնական բանկային հաշիվների օգտագործումը սահմանափակվել է:
Այս մասին նրանց տներում խուզարկությունից չորս օր անց՝ հոկտեմբերի 28-ին, հայտարարել է Գելավայի ամուսինը՝ ընդդիմադիր «Ֆեդերալիստներ» կուսակցության առաջնորդ Գիորգի Նոնիաշվիլին:
Գելավայի փաստաբան Շոթա Թութբերիձեն ասել է՝ բանկային հաշիվները սառեցվում են առանց դատարանի որոշման, ոչ պաշտոնական հիմունքներով, ինչի մասին բանկերը տեղեկատվություն չեն տրամադրում, ինչը օրենքի խախտում է։
«Մենք պարզաբանում ենք, որ բանկը գործում է օրենքի համաձայն, ներառյալ առևտրային բանկերի գործունեության վերաբերյալ Վրաստանի օրենքով սահմանված կանոնները», — ասել են TBC բանկից՝ չպարզաբանելով, թե կոնկրետ ինչ հիմքով է ընդունվել որոշումը:
Բուզիաշվիլին և Գելավան աշխատում են ամերիկյան հետազոտական կազմակերպությունում՝ ապատեղեկատվական ծրագրում. նրանք հատկապես ակտիվ են ռուսաստանյան տեղեկատվական գործողությունների ուսումնասիրության մեջ։ Ֆինանսական ոստիկանության աշխատակիցները հետազոտողների տները խուզարկել են խորհրդարանական ընտրություններից երկու օր առաջ՝ հոկտեմբերի 24-ին։
Բացի Ատլանտյան խորհրդի հետազոտողների տներից, հոկտեմբերի 24-ին խուզարկվել են առնվազն երկու այլ տներ և մեկ ընկերություն: Ֆինանսական ոստիկանության տրամադրած տեղեկատվության համաձայն՝ գործակալությունը քննչական գործողություններ է իրականացնում «զանգերի կենտրոնի» գործի քննության շրջանակներում։ Ամերիկյան կազմակերպության հետազոտողների կապը «զանգերի կենտրոնների» գործի հետ այս պահին պարզ չէ:
