Վերջին 24 ժամվա ընթացքում Վրաստանում իրավապահ մարմինները արտակարգ դրության և պարետային ժամի խախտման 102 նոր դեպք են հայտնաբերել:
Ոստիկանությունը ապրիլի 20-ի ժամը 21:00-ից մինչև ապրիլի 21-ի ժամը 06:00-ը պարետային ժամի խախտման համար ամբողջ երկրի մասշտաբով 55 քաղաքացու է տուգանել: Հանրային վայրերում 3-ից ավելի մարդկանց հավաքվելու և 2 մետր հեռավորություն չպահելու համար ընդհանուր հաշվով տուգանվել է 10 քաղաքացի: Ուղևորների փոխադրման և ավտոմեքենայով տեղաշարժվելու կարգը խախտելու համար տուգանվել է 36 անձ:
ՆԳ նախարարությունը կրկին կոչ է անում քաղաքացիներին պահպանել արտակարգ դրության պայմաններում գործող սահմանափակումները, հակառակ դեպքում կկիրառվեն օրենքով սահմանված միջոցներ:
Արտակարգ դրության ռեժիմը խախտելու համար ֆիզիկական անձը կտուգանվի 3 000 լարիով, իսկ իրավաբանական անձը՝ 15 000 լարիով: Խախտումները կրկնելու դեպքում հանցանքը ենթադրում է մինչև 3 տարվա ազատազրկում:
