«Ի՞նչ Վրաստանի մասին է խոսքը, շուտով մնալու ենք երկաթգծի այս կողմում՝ առանց SWIFT-ի, բանկային օպերացիաների, ինտերնետի և առանց որևէ բանի, այս մասին պետք է մտածենք»,-«Ալիք Մեդիայի» հետ զրույցն այսպես է սկսում Վրաստանի ռազմավարական վերլուծական կենտրոնի փորձագետ Գելա Վասաձեն։
Վասաձեի խոսքով՝ անհիմն է մտածել Եվրարմիությանը անդամակցության մասին, երբ Վրաստանում կա այսպիսի կառավարություն.
«Վրաստանը կառավարություն չունի, և երբ կառավարություն չունի, դա նշանակում է, որ մենք տուժելու ենք։ Ո՞վ կընդունի այսպիսի Վրաստանին Եվրամիություն»։
Ըստ Վասաձեի՝ Վրաստանը կտրված է լինելու քաղաքակիրթ աշխարհից։
«Եվրամիությանը միանալու Խորհրդային պետություններից ամենամեծ շանսը մենք ենք ունեցել, իսկ հիմա՝ արդեն ոչ»,-ասում է Վասաձեն։
Վրաստանի անվտանգության քաղաքականության ինստիտուտի հիմնադիր Դավիդ Բրագվաձեի կարծիքով՝ այս փուլում ԵՄ-ին անդամակցելու հնարավորություն գործնականում չկա։ Այս շանսը շատ փոքր է նաև Ուկրաինայի դեպքում։ Ուկրաինան կարող է ստանալ թեկնածուի կարգավիճակ, ինչը, անշուշտ, կարևոր կլինի, թեև Կիևը նույնպես երկար ճանապարհ կունենա մինչև անդամակցությունը։
«Վրաստանը հայտնել է իր դիրքորոշումը, որ անդամակցության հայտ կներկայացնի 2024 թվականին։ Հնարավոր է, որ այս պահին մենք շատ առաջ գնանք պարտականությունների առումով և ունենանք ավելի ֆորմալ հիմքեր»,-ասում է Բրագվաձեն։
Ըստ Բրագվաձեի՝ այժմ դիմում պատրաստելն ավելի խորհրդանշական ժեստ կլինի, քանի որ Վրաստանն ունի բազմաթիվ պարտավորություններ, որոնք պետք է ստանձնի համատեղելիության հասնելու համար.
«Եթե կառավարությունը որոշի փոխել այս դիրքորոշումը և 2024-ի փոխարեն հիմա դիմի, ես դա դրական կգնահատեի, թեև դա, հավանաբար, կլինի Ուկրաինայի միջև խորհրդանշական և իշխող համերաշխության ակտ, և ինչ-որ մեկը դա չպետք է հասկանա, կարծես անդամակցության հարցը որոշված է»։
Բրագվաձեի խոսքով, կարևոր է նաև տեսնել այս գործընթացի աջակցությունը ինչպես Եվրախորհրդարանի ամենամեծ խմբակցություններից մեկի, այնպես էլ ԵՄ անդամ երկրի՝ Ռումինիայի նախագահի կողմից։
Նշենք, որ Վրաստանի նախկին վարչապետ, այժմ ընդդիմադիր «Վրաստանի համար» կուսակցության հիմնադիր Գիորգի Գախարիան բաց նամակ է հղել Եվրախորհրդարանի արտաքին հարաբերությունների հանձնաժողովի նախագահ Դեյվիդ Մաքալիսթերին և հանձնաժողովի անդամներին՝ խնդրելով Վրաստանին աջակցել Եվրամիությանն անդամակցելուն։
Գախարիան նշել է, որ թեև Վրաստանը լիովին չի բավարարում Եվրամիության պահանջներին, այնուամենայնիվ, արժանի է Եվրամիության անդամ լինելու հնարավորությանը։
Հատկանշական է նաև, որ վրացական 21 հասարակական կազմակերպություններ (ՀԿ) ևս դիմել են Եվրամիության ներկայացուցիչներին, որպեսզի նրանք լուծեն ԵՄ-ին Ուկրաինայի անդամակցության հարցը և բացեն Վրաստանի և Մոլդովայի համար ԵՄ-ին միանալու դուռը, քանի որ «այս երեք երկրները բախվում են նույն խնդիրներին»։
