Վրաստանի ոչ լեգիտիմ խամաճիկ կառավարությունը շարունակում է դաժանորեն հարձակվել վրացիների վրա, հայտարարել է Ամերիկայի Միացյալ Նահանգների Ներկայացուցիչների պալատի հանրապետական անդամ, Հելսինկյան հանձնաժողովի նախագահ, MEGOBARI Act-ի համահեղինակ Ջո Ուիլսոնը:
Ուիլսոնը կոչ է արել անհապաղ պատժամիջոցներ կիրառել իշխող «Վրացական երազանք» կուսակցության հիմնադիր և պատվավոր նախագահ Բիձինա Իվանիշվիլիի և «նրա «Վրացական երազանքի» շրջապատի դեմ»։
«Մենք չենք կարող մի կողմ կանգնել և թույլ տալ, որ Վրաստանը դառնա բռնապետություն՝ հակառակ ժողովրդի կամքին։ #MEGOBARI», — գրել է Ուիլսոնը:
Վաշինգտոնը նոր պատժամիջոցներ կսահմանի Վրաստանի իշխող «Վրացական երազանք» կուսակցության մի շարք բարձրաստիճան պաշտոնյաների նկատմամբ:
Հիշեցնենք. Ամերիկայի Միացյալ Նահանգները դադարեցրել է ռազմավարական գործընկերությունը Վրաստանի հետ:
Նոյեմբերի 28-ից ի վեր Թբիլիսիում և Վրաստանի այլ քաղաքներում բողոքի ակցիաներ են ընթանում ի պաշտպանություն եվրաինտեգրման։
Հատուկջոկատայինները բիրտ ուժի կիրառմամբ՝ ջրցան մեքենաներով, ջրի շիթերով, պղպեղի սփրեյով, արցունքաբեր գազով, ռետինե փամփուշտներով ցրում են բողոքի ցույցերը Թբիլիսիում: Բերման ենթարկվածները թե՛ բերման ենթարկվելիս, թե՛ դրանից հետո, բռնության են ենթարկվում: Տուժածների թվում կան նաև լրագրողներ:
