Վրաստանում Ամերիկայի Միացյալ Նահանգների դեսպան Ռոբին Դաննիգանը հայտարարություն է տարածել, որտեղ արձագանքել է Վրաստանի իշխող «Վրացական երազանք» կուսակցության կողմից «գործակալների մասին օրենքն» ընդունելու ջանքին։
«Խորապես անհանգստացած եմ, որ վերջին շաբաթների ընթացքում Վրաստանի կառավարության ընտրությունները հեռացրել են երկիրն իր եվրատլանտյան ապագայից, նպատակ, որին ցանկանում է հասնել վրացիների ճնշող մեծամասնությունը: Ցավոք, իշխող կուսակցությունը, կարծես, վճռական է ընդունել մի օրենք, որի հանդեպ ԵՄ-ն հստակ ցույց է տվել, որ դա անհամատեղելի է Վրաստանի ԵՄ ձգտումներին: Միաժամանակ, իշխող կուսակցության որոշ ներկայացուցիչներ նախընտրեցին հարձակվել Վրաստանի ինքնիշխանության ամենամեծ ջատագովների՝ ԱՄՆ-ի և Եվրամիության վրա։ Մենք կանգնեցինք Վրաստանի կողքին և բանակցում ենք այն երկրի հետ, որը զբաղեցնում է Վրաստանի տարածքի քսան տոկոսը։ Մենք աջակցել և աջակցում ենք վրաց լեզվի, մշակութային և պատմական ժառանգության պահպանմանը», — նշված է հայտարարության մեջ։
Դեսպանը նշել է, որ վերջերս իրենք Վրաստանի կառավարության բարձրաստիճան պաշտոնյաներին հրավիրել են ԱՄՆ բարձրաստիճան պաշտոնյաների հետ քննարկելու ռազմավարական գործընկերության և ԱՄՆ աջակցության վերաբերյալ ցանկացած հարց, սակայն վրացական կողմը նախընտրել է մերժել այդ հրավերը։
«Մենք կոչ ենք անում Վրաստանի կառավարությանը վերահաստատել իր հավատարմությունը Վրաստանի եվրատլանտյան ապագային, ինչպես դա գրված է Վրաստանի Սահմանադրության մեջ։ Միացյալ Նահանգները հավատարիմ է մնում մեր ամուր հարաբերություններին և ցանկանում է միայն խաղաղություն, կայունություն և բարգավաճում Վրաստանի ժողովրդի համար»,- ասված է հայտարարության մեջ։
