«Վրաստանի երիտասարդ իրավաբանների ասոցիացիա»-ի (GYLA) նախագահ, փաստաբան Նոնա Քուրդովանիձեն հայտնել է, որ բանտում այցելել է «Բաթումելեբի» և «Նեթգազեթի» լրատվամիջոցների հիմնադիր Մզիա Ամաղլոբելիին։ Ըստ Քուրդովանիձեի՝ առողջական խնդիրներ ունեցող Ամաղլոբելին մտադիր չէ դադարեցնել հացադուլը։
Հունվարի 22-ին, հաշվի առնելով Ամաղլոբելիի առողջական վիճակը, գործընկերները համատեղ նամակով դիմել են նրան և հորդորել դադարեցնել հացադուլը, սակայն նա մտադիր չէ դադարեցնել բողոքի այս ծայրահեղ ձևը։
«Ի նշան բողոքի շարունակում է հացադուլը, համարձակ է: Ասաց՝ հացադուլ է անում ոչ թե ինչ-որ մեղմացում ստանալու համար, այլ՝ անարդարության դեմ բողոքելու համար», — Ամաղլոբելիին այցելելուց հետո Facebook-ում գրել է Քուրդովանիձեն:
Նա նաև հրապարակել է Ամաղլոբելիի հետևյալ հայտարարությունները. «Ժողովրդավարությունը նվեր չէ: Մեր հասարակությունը դա ամենից լավ գիտի, և դա ակնհայտ է դարձել նաև հիմա։ Եթե դադարեցնեմ հացադուլը, ինձ կհամարեմ այս անարդարության մեղսակից»։
Ամաղլոբելին ձերբակալվել է 2025 թվականի հունվարի 11-ին Բաթումիի ոստիկանապետ Իրակլի Ջեբուաձեի ցուցումով այն բանից հետո, երբ ապտակել էր Ջեբուաձեին։
Ապտակից հետո Ամաղլոբելին մեղադրվում է «ոստիկանի վրա հարձակվելու» համար, և նրան սպառնում է 4-ից 7 տարվա ազատազրկում։ Գործընկերները, քաղաքացիական հասարակությունը, քաղաքական գործիչները նրան համարում են քաղբանտարկյալ:
Հունվարի 14-ին Բաթումիի քաղաքային դատարանն Ամաղլոբելիի խափանման միջոց է ընտրել ազատազրկումը։ Որոշումը բողոքարկվել է, սակայն Քութաիսիի վերաքննիչ դատարանը բողոքը վարույթ չի ընդունել, չնայած ազատազրկումը չերկարացնելու մասին հանրային պաշտպանի կողմից Վերաքննիչ դատարան դիմումին։
Ամաղլոբելիի գործով մինչդատական նիստը նշանակված է մարտի 4-ին։ Ամեն օր բողոքի ակցիաներ են անցկացվում՝ պահանջելով ազատ արձակել քաղբանտարկյալ Ամաղլոբելիին:
