Աբխազիայում սգո օր է հայտարարված՝ դե ֆակտո հանրապետության վարչապետ Գենադի Գագուլիայի ողբերգական մահվան կապակցությամբ: Այսօր նրան կհուղարկավորեն Գուդաութայի շրջանի Լիխնի գյուղում, նրա ծննդավայրում:
Հիշեցնենք, որ սեպտեմբերի 8-ի երեկոյան Վազ 2199 մակնիշի ավտոմեքենայի 22-ամյա վարորդը չէր զիջել վարչապետ Գենադի Գագուլիայի ծառայողական մեքենային՝ դուրս գալով հանդիպակաց երթևեկելի գոտի: Բախման հետևանքով Գագուլիան գանգուղեղային վնասվածք էր ստացել և մահացել հիվանդանոցի ճանապարհին: Ավելի ուշ Աբխազիայի իրավապահները հայտարարել են, թե վարորդը չի ունեցել վարորդական իրավունք և վթարի պահին գտնվել է թմրանյութի ազդեցության տակ:
Կառավարության ղեկավարը պաշտոնական այցով եղել էր Սիրիայում և ավտոշարասյունը, որում գտնվում էր նա, վերադառնում էր Սոչիի օդանավակայանից։
70-ամյա Գագուլիան Աբխազիայի դե ֆակտո կառավարության ղեկավարի պաշտոնը ստանձնել էր այս տարվա ապրիլի 24-ին:
Գագուլիան ծնվել է 1948թ. հունվարի 4-ին Աբխազիայի Գուդաութիի շրջանի Լիխնի գյուղում: 1995-1997 և 2002-2003թթ.-ին եղել է Աբխազիայի վարչապետը: 2003-2004թթ.-ին եղել է Աբխազիայի նախագահի աշխատակազմի ղեկավարը:
