«Թրանսփարենսի Ինթերնեշնլ Վրաստանը» (TI) հայտարարություն է տարածել Մամուկա Խազարաձեի, Բադրի Ջափարիձեի և Ավթանդիլ Ծերեթելիի գործով, որում ասվում է, որ քաղաքական դատավարությունն է տեղի ունենում։
Գործի նյութերի ուսումնասիրության և ընթացքի դիտարկման հիման վրա կազմակերպությունը նշում է, որ գործն ունի եզակի քաղաքական դրդապատճառներ և կարող է ծառայել մի կողմից՝ պատժելու և վարկաբեկելու քաղաքական հակառակորդին, իսկ մյուս կողմից՝ կասեցնելու երկրի համար կարևոր ռազմավարական օբյեկտի կառուցումը։
Ըստ TI-ի՝ գործում առկա խնդիրները քննարկել է փողերի լվացման դեմ պայքարի անկախ միջազգային փորձագետ Փոլին Դեյվիդը՝ հրավիրված Transparency International Georgia-ի կողմից, որի զեկույցը հրապարակվել է 2020 թվականի մայիսի 14-ին և ներկայացվել դատարան։
Զեկույցի համաձայն՝ գործում չկան ապացույցներ այն մասին, որ Մամուկա Խազարաձեն, Բադրի Ջափարիձեն և Ավթանդիլ Ծերեթելին կատարել են փողերի լվացման անհատական կամ խմբակային հանցագործություններ, և եթե անգամ դատարանը գործի բոլոր փաստերը համարել է մեղադրող կողմի օգտին՝ այս հանգամանքներն անգամ չեն ապացուցում փողերի լվացման մեղադրանքները։
TI-ը նաև նշում է, որ քանի որ Վրաստանի դատախազությունը չի կարող քրեական պատասխանատվության ենթարկել գույքի յուրացման հետ կապված հանցագործությունը վաղեմության ժամկետի ավարտի պատճառով, անհնար է ապացուցել ենթադրյալ հիմնական հանցագործությունը։
«Միջազգային պրակտիկայի համաձայն՝ անպատշաճ կամ արհեստականորեն ստեղծված մեղադրանքների հիման վրա (տվյալ դեպքում՝ փողերի լվացման) վաղեմության ժամկետը շրջանցելը համարվում է իրավական գործընթացի չարաշահում»,- նշել են կազմակերպությունից։
Նշվում է, որ կողմերի վճիռը բողոքարկելու դեպքում «Թրանսփարենսի Ինթերնեշնլ Վրաստանը» կշարունակի գործի մոնիտորինգը վերադաս ատյաններում։
Հիշեցնենք՝ Թբիլիսիի քաղաքային դատարանն այսպես կոչված փողերի լվացման գործով մեղավոր է ճանաչել Մամուկա Խազարաձեին, Բադրի Ջափարիձեին և Ավթանդիլ Ծերեթելիին և նրանց դատապարտել 7-7 տարվա ազատազրկման, սակայն գործի վաղեմության պատճառով նրանք ազատվել են քրեական պատասխանատվությունից։
