Վրաստանի ֆինանսների նախարարը ազարտային խաղերի բիզնեսի համար նոր կանոնակարգ է մշակել, ըստ որի՝ կսահմանափակվի ազարտային խաղերի բիզնեսի գովազդը և կբարձրացվի հարկային դրույքաչափը։ Այս մասին հայտարարել է Վրաստանի վարչապետ Իրակլի Ղարիբաշվիլին։
«Օնլայն ազարտային խաղային բիզնեսի համար կներդրվի հարկային նոր մեխանիզմ։ Ընդհանուր առմամբ, ոլորտի հարկերի հարկային բազան կավելանա 65-70 տոկոսով»,- ասել է Ղարիբաշվիլին։
Ղարիբաշվիլիի խոսքով՝ մինչև 25 տարեկան քաղաքացիներին կարգելվի մասնակցել ազարտային խաղերին։ Սահմանվել է նաև այն անձանց շրջանակը, որոնց կարգելվի ազարտային խաղերը։
Մասնավորապես.
- պետությունից օգնություն ստացող սոցիալապես անապահով անձինք,
- պետական պաշտոնյաներ,
- անձինք, ովքեր դիմում են Եկամուտների ծառայություն՝ կիրառելու ինքնասահմանափակման մեխանիզմը (այսպես կոչված՝ սև ցուցակ),
- ընտանիքի անդամների պահանջով՝ դատարանի որոշմամբ սև ցուցակում հայտնված անձինք։
Ըստ Ղարիբաշվիլիի՝ ընդհանուր առմամբ մեկ միլիոն քաղաքացու կսահմանափակվի առցանց ազարտային խաղերի մասնակցությունը։
Արգելվում է նաև ազարտային խաղերի գովազդը, թեև հովանավորչական պայմանագիր կնքելու հնարավորությունը մնում է ուժի մեջ։
«Բոլոր տեսակի հեռուստատեսային և արտաքին գովազդը, ինչպես նաև վրացական կայքերում գովազդը կարգելվի։ Խաղային բիզնեսի օպերատորներին կթույլատրվի չեղարկել միայն հովանավորչական պայմանագիրը, այն հիմնականում կարող է կապված լինել միայն սպորտի հետ», — ասել է Ղարիբաշվիլին։
Նորայր Միսկարյան, «Ալիք մեդիայի» ստաժոր
