Վրաստանում կորոնավիրուսի պատվաստանյութի, այսպես կոչված խթանող (booster) դեղաչափը թույլատրվում է 50 տարեկանից բարձր և քրոնիկ հիվանդություններ ունեցող քաղաքացիներին։ Ըստ առողջապահության փոխնախարար Թամար Գաբունիայի, լրացուցիչ կարող են պատրաստվել ինչպես Pfizer-ով, այնպես էլ չինական պատվաստանյութերով, սակայն ոչ AstraZeneca- ով:

«Քրոնիկ հիվանդություններ ունեցող անձինք, ովքեր արդեն ընդունել են ցանկացած պատվաստանյութի երկու դեղաչափ՝ լինի դա AstraZeneca- ն, Sinopharm- ը, Sinovac- ը կամ Pfizer- ը, երկրորդ պատվաստումից 6 ամսվա ընթացքում կարող են ստանալ ուժեղացուցիչ դոզան։ AstraZeneca պատվաստանյութով խթանող դոզան չի արվում, սակայն AstraZeneca պատվաստանյութով պատվաստված մարդիկ կարող են ստանալ ուժեղացուցիչ դոզան, օրինակ՝ Pfizer պատվաստանյութով», — ասել է առողջապահության փոխնախարար Թամար Գաբունիան:

Ինչ վերաբերում է 12-15 տարեկան երեխաների պատվաստմանը, Գաբունիան հայտնել է, որ այն խորհուրդ է տրվում միայն քրոնիկ հիվանդություններ ունեցող երեխաներին, իսկ նրանք, ովքեր առաջին դոզան ստացել են արտերկրում, երկրորդ դեղաչափը կառաջարկվի Վրաստանում` Pfizer պատվաստանյութով:

Ժաննա Չոգանդարյան, «Ալիք մեդիայի» ստաժոր