Վրաստանի նախագահ Սալոմե Զուրաբիշվիլին հայտարարել է, որ պատասխանատվություն չի ստանձնի իշխող «Վրացական երազանք»-ի կողմից ապրիլի 19-ի պայմանագիրը չեղյալ հայտարարելու համար: Երկրի նախագահն այս մասին խոսել է օգոստոսի 2-ին իշխող և ընդդիմադիր կուսակցությունների հետ հանդիպումներ անցկացնելուց հետո:
Զուրաբիշվիլին ասել է, որ փաստաթղթի հիմքում ընկած սկզբունքները սպառված չեն:
«Ես անձամբ որոշակի պատասխանատվություն եմ վերցնում և հպարտ եմ, որ աջակցել եմ Եվրամիության ներգրավմանն այն ժամանակ, երբ երկրում քաղաքական ճգնաժամ էր տիրում: Այնուամենայնիվ, ես չեմ կարող պատասխանատվություն կրել կողմերի միջև համաձայնեցված փաստաթղթի առանձին տարրերի համար, ինչպես նաև փաստաթղթի չեղարկման համար: Այնուամենայնիվ, ինձ համար անհասկանալի է մնում տեսակետը, թե հրաժարվել են մի բանից, ինչն անընդունելի էր և կարող էր վնասել երկրին: Իմ փորձից ելնելով՝ ես գիտեմ, թե ինչպես պետք է կարմիր գծեր գծեմ ստորագրելուց առաջ», — ասել է Զուրաբիշվիլին:
Նշենք, որ «Վրացական երազանք» կուսակցության նախագահ Իրակլի Կոբախիձեն ասել է նաև, որ իշխող կուսակցությունը ոչ միայն չի վերադառնա ապրիլի 19-ի պայմանագրին, այլև հետագայում որևէ նման պայմանագիր չի ստորագրի:
Զուրաբիշվիլիի խոսքով, ինքը համաձայն չէ իշխող կուսակցության գնահատականի հետ, որ փաստաթղթի ստորագրմամբ բևեռացումը չի նվազել և որ այդպիսով է բացատրվում փաստաթղթի չեղարկումը:
«Այս փաստաթղթի արդյունքն է, որ որոշ ընդդիմադիր ուժեր քաղաքական գործընթացները փողոց չտեղափոխեցին, կորցրին ապակայունացման բոլոր ռեսուրսները, և չստորագրելով՝ մարգինալացվեցին», — նշել է նախագահը:
