Վրաստանի ներքին գործերի նախարարությունը հայտարարություն է տարածել, որով կոչ է անում Դմանիսիում ընդհարման մեջ գտնվող կողմերին հնազանդվել ոստիկանության օրինական պահանջներին և պահպանել հանգստություն, որպեսզի բախումը արհեստականորեն չվերածվի էթնիկական առճակատման:
Ինչպես նշված է հայտարարության մեջ, առճակատման կրկնությունը կանխելու և իրադարձությունների արհեստական սրացումից խուսափելու համար գերատեսչության աշխատակիցները մոբիլիզացված են և պահպանում են հասարակական կարգը:
«Ներքին գործերի նախարարությունը, որպես կարգուկանոնի պահպանման պատասխանատու գերատեսչություն, կոչ է անում Դմանիսիում հավաքված քաղաքացիներին հետևել օրենքի պահանջներին ու պահպանել իրենց հանդարտությունը: Ոստիկանությունը կգործի իրեն տրված մանդատի շրջանակներում և կպատասխանի ցանկացած օրենքի խախտմանը:
ՆԳՆ-ի կողմից իրականացված քննչական միջոցառումների արդյունքում այս փուլում պարզվել է, որ այս տարվա մայիսի 16-ին, Դմանիսիում, տեղացիների միջև կենցաղային հողի վրա տեղի է ունեցել ընդհարում, ինչը վերածվել է խմբակային բռնության: Ոստիկանությունը պարզել է առճակատման մեջ ներգրավված անձանց, հետաքննության շրջանակներում կատարվում են բոլոր անհրաժեշտ քննչական և դատավարական գործողությունները:
Դմանիսիում առճակատման կրկնությունը կանխելու և իրադարձությունների արհեստական սրացումից խուսափելու համար ՆԳՆ աշխատակազմը մոբիլիզացվում է և պահպանում հասարակական կարգը», — ասված է ՆԳՆ-ի հայտարարության մեջ:
Հիշեցնենք, որ նախօրեին Դմանիսիի էթնիկ ադրբեջանցիների և Սվանեթիից եկած էկո միգրանտների միջև վիճաբանությունը վերածվել էր մահակներով ծեծկռտուքի, որին մի քանի տասնյակ մարդ է մասնակցել: Կան տուժածներ: Իրավիճակը լարվել է երեկոյան, պարետային ժամի պայմաններում: Վնասվել է առևտրի կենտրոնը, որի մոտ սկսվել էր առճակատումը:
