Վրաստանի ներքին գործերի փոխնախարար Նինո Ցացիաշվիլիի խոսքով՝ գործակալությունը հետաքննություն է սկսել ենթադրյալ 6 հանցագործությունների վերաբերյալ: Ենթադրյալ հանցագործությունների մեծ մասը ծեծկռտուքի հիմքով է:
Գործակալությունը նշում է, որ այս փուլում նշված քրեական գործերով ընթանում են ինտենսիվ քննչական և դատավարական գործողություններ:
ՆԳ նախարարի տեղակալի խոսքով՝ ՆԳՆ-ն պատասխանատու է երկրում անվտանգության ու օրինականության պահպանման համար և շարունակում է ակտիվ գործողություններ իրականացնել: Վրաստանի ամբողջ տարածքում ոստիկանության ուժերի վերաբաշխումը կշարունակվի ողջ օրվա ընթացքում:
«Մենք դիմում ենք ընտրությունների գործընթացում ներգրավված անձին կամ կազմակերպությանը, անկախ քաղաքական հայացքներից, պահպանել օրենքը և անհրաժեշտության դեպքում դիմել ոստիկանություն, որպեսզի բոլորը կարողանան միասին նպաստել ընտրությունների խաղաղ անցկացմանը: Մենք պարբերաբար և ակտիվորեն ձեզ կտրամադրենք տեղեկատվություն ընտրությունների ընթացքում հայտնաբերված հնարավոր խախտումների մասին», — ասաց ՆԳ փոխնախարարը:
