Վրաստանի իշխանություններն ուկրաինական կողմից պարզաբանում կպահանջեն` Ուկրաինայի բարեփոխումների ազգային խորհրդի  գործադիր կոմիտեի ղեկավար Միխեիլ Սաակաշվիլիի հայտարարության հետ կապված:

Այս մասին լրագրողներին ասել է պաշտպանության և անվտանգության խորհրդարանական կոմիտեի  ղեկավար Իրակլի Սեսիաշվիլին:

Հիշեցնենք` Սաակաշվիլին ֆեյսբուքյան իր էջում հայտնել էր, թե չի ճանաչում վրաստանյան ներկա կառավարության լեգիտիմությունը:  Նա ընդգծել է նաև, որ Վրաստանում հոկտեմբերին կայանալիք խորհրդարանական ընտրությունների ընթացքում «առաջնագծում» է լինելու:

Ըստ Սեսիաշվիլիի`  Սաակաշվիլին ուկրաինական իշխանության ներկայացուցիչ է, հանրային դեմք, հետևաբար` Վրաստանի կառավարության լեգիտիմությանը վերաբերող նրա հայտարարությունը առանց արձագանք չի մնալու, իսկ պատասխանը պետք է տա Ուկրաինայի ղեկավարությունը: Ըստ վրաց պաշտոնյայի` իր քարոզչական հայտարարություններով Սաակաշվիլին միջամտում է Վրաստանի ներքին գործերին:

Հունիսին Վրաստանի ԱԳՆ-ն Վրաստանում Ուկրաինայի դեսպանից էր բացատրություն պահանջել` Սաակաշվիլիի այն  հայտարարության  հետ կապված, թե ինքը լինելու է ընտրությունների պայքարի առաջնագծում ու հասնելու է հաղթանակի: «Ուկրաինայի դիրքորոշումը հետևյալն է. Սաակաշվիլին  Ուկրաինայում պաշտոնատար անձ չէ, գործադիր իշխանության մաս չի կազմում»,- ասել է Վրաստանում Ուկրաինայի դեսպանը:

Հիշեցնենք` Սաակաշվիլին Վրաստանի նախագահն է եղել 2004-2013 թթ-ին: «Միացյալ ազգային շարժում» կուսակցության պարտությունից ու նախագահական ժամկետը սպառվելուց հետո նա լքեց երկիրն ու մինչև 2015-ը ապրում էր արտերկրում։ Հետագայում Ուկրաինայի նախկին նախագահ Պյոտեր Պորոշենկոն նրան առաջարկեց Օդեսայի նահանգապետի աթոռն ու Ուկրաինայի քաղաքացիություն շնորհեց:  Վրաստանի օրենքի համաձայն` Սաակաշվիլին ավտոմատ զրկվեց Վրաստանի քաղաքացիությունից: Նրա և իր կողմակիցների` վերջին տարիների գործողությունները մի քանի քրեական գործերի պատճառ են դարձել: Ներկայումս Սաակաշվիլին հեռակա կարգով 2 անգամ դատապարտվել է` ընդհանուր 6 տարի ժամկետով,  մի քանի գործ դեռ ընթացքի մեջ է:

Ուկրաինայում Սաակաշվիլիի քաղաքական կարիերան հարթ չէր: Օդեսայի նահանգապետի պաշտոնում նա մեկ տարի էլ չմնաց. Զրկվեց ուկրաինական քաղաքացիությունից, վտարվեց ու արգելվեց նրա մուտքը Ուրաինա: Վերադառնալ կարողացավ միայն նախագահ Վլադիմիր Զելենսկիի` նրան քաղաքացիությունը վերադարձնելու և մուտքը թույլատրելու որոշումից հետո:

Լուսանկարը` Սաակաշվիլիի ֆեսյբուքյան էջից