Վրաստանի խորհրդարանը այսօրվա արտահերթ նիստում երրորդ ընթերցմամբ կողմ քվեարկեց սահմանադրական փոփոխություններին: Օրինագծին կողմ քվեարկեց 117 պատգամավոր, դեմ՝ 3-ը:
Այսօրվա նիստին էլ նախորդների պես չմասնակցեցին ընդդիմադիր «Ազգային շարժում» և «Եվրոպական Վրաստան» կուսակցությունները, որոնց միակ պահանջը Գիորգի Ռուռուայի ազատ արձակումն էր:
Սահմանադրական փոփոխությունների մասին հակիրճ
Սահմանադրական փոփոխությունների համաձայն՝ 2020 թվականի խորհրդարանական ընտրությունները կանցկացվեն խառը ընտրական կարգով (120 համամասնական, 30 մեծամասնական) և 1 տոկոսանոց անցողիկ շեմով:
Օրինագիծը ենթադրում է 40 տոկոսանոց արգելքի մեխանիզմ, ինչը նշանակում է, որ որևէ կուսակցություն 2020 թվականի ընտրություններին համամասնական կարգով 40,54 տոկոսից պակաս աջակցություն ստանալու դեպքում միակուսակցական կառավարություն ձևավորելու հնարավորություն չի ունենա. կոալիցիոն կառավարության ձևավորման անհրաժեշտություն կլինի:
