Մոտ 30 ընդդիմադիր կուսակցություններ պատրաստվում են բողոքի ակցիաների վերսկսմանը:
Ակցիաների անցկացման կոնկրետ օրերի մասին կհայտնեն հունվարի ընթացքում՝ ասել է «Նոր Վրաստան» ընդդիմադիր կուսակցության առաջնորդ Գիորգի Վաշաձեն:
Հիշեցնենք՝ Վրաստանի հիմնական ընդդիմադիր ուժերը նախորդ տարվա նոյեմբերից ակցիաներ են անցկացնում՝ այս տարվա աշնանը նշանակված խորհրդարանական ընտրությունների ընտրակարգը փոխելու պահանջով:
Նախորդ տարվա դեկտեմբերին իշխող կուսակցությունն առաջին անգամ խոսեց զիջումների գնալու պատրաստակամության մասին՝ մասնավորապես քննարկել 150-ից 73 պատգամավորի ոչ թե մեծամասնական, այլ համամասնական ընտրակարգով առաջադրվելու նպատակահարմարությունը:
Ընդդիմությունն առաջարկել է ընտրություն կազմակերպել այսպես կոչված գերմանական մոդելով, այս դեպքում մեծամասնական կարգը պահպանվում է, սակայն ոչ թե մեկ, այլ բազմամանդատանոց շրջաններում: Ընդ որում կուսակցությունն այնքան տեղ կստանա խորհրդարանում, որքան նրան հասնում է համամասնական կարգով: Իշխանություններն արդեն ասել են, որ սա հակասում է երկրի սահմանադրությանը, բայց այս թեմայով քննարկմանը մասնակցել են:
