Վրաստանի պետական պաշտոնյաները սեպտեմբերի 20-ին վարչապետ Գիորգի Կվիրիկաշվիլիից էլեկտրոնային նամակ են ստացել: Այս մասին տեղեկացնում է Կառավարության մամուլի ծառայությունը: «Պետական կառավարման համակարգի բոլոր աշխատակիցներս երկրի առջև մեծ պատասխանատվություն ենք կրում: Մեր յուրաքանչյուր որոշումն ու քայլը, ծախսված յուրաքանչյուր լարին ծառայում է հասարակության շահերին: Այդ պատճառով խիստ կարևոր է` գործել օրենքի շրջանակներում: Օրենքի նույնիսկ աննշան խախտումը կարող է հասարակության շրջանում Կառավարության հանդեպ անվստահության մթնոլորտ ստեղծել, ինչն անընդունելի է»,-ասված է Կառավարության ղեկավարի` պաշտոնյաներին ուղղված նամակում:
Գիորգի Կվիրիկաշվիլին նշել է, որ այս օրերին, երբ երկիրը պատրաստվում է խորհդարանական ընտրություններին, քաղաքական ուժերը աննախադեպ ակտիվություն են ցուցաբերում: Նա պաշտոնյաներին հորդորել է մեծ ուշադրությամբ ու բարեխղճությամբ կատարել պարտականությունները` հետևելով նախընտրական շրջանում ընթացող գործընթացներին, օրենքի յուրաքանչյուր տառին:
Վրաստանի վարչապետը, ով նաև «Վրացական երազանք» կուսակցության առաջնորդն է, պաշտոնյաների էլեկտրոնային հասցեներին է ուղարկել նախընտրական գործընթացում ընդգրկվելու մասին պետծառայողների համար սահմանված օրենքները:
« Խնդրում եմ ծանոթանալ և պահպանել այն ձեր ամենօրյա գործունեության մեջ: Պետական ծառայության համբավը մեզանից յուրաքանչյուրի ձեռքում է: Ուզում եմ կատարած աշխատանքի համար շնորհակալություն հայտնել բոլորին` կոչ անելով շարունակել նույն տեմպով, օրենքի շրջանակներում »:
Վարչապետի էլեկտրոնային նամակը հրապարակել է «interpressnews»-ը:
