Պրոֆեսիոնալ վրացի բռնցքամարտիկ Ավթանդիլ Խուրցիձեն զրկվել է աշխարհի գործող չեմպիոնի տիտղոսից: Այսպիսի որոշում է կայացրել Բռնցքամարտի համաշխարհային կազմակերպությունն (WBO) այն բանից հետո, երբ մարզիկը ձերբակալվել էր ԱՄՆ-ում կազմակերպված հանցավոր խմբի հետ համաձայնության մեղադրանքով: Խուրցիձեն 10 օր ունի որոշումը բողոքարկելու համար, այլ դեպքում նա տիտղոսը մեկընդմիշտ կկորցնի: Հուլիսի 8-ին Լոնդոնում պետք է կայանար բրիտանացի Բիլլի Ջո Սոնդեսրի հետ մենամարտը WBO International վարկածով աշխարհի չեմպիոնի գոտու համար, սակայն մարտը հանվել է:
Հիշեցնենք՝ Խուրցիձեն մեկն էր այն 33 անձանցից, ովքեր երկու շաբաթ առաջ ձերբակալվել էին Նյու Յորքում և մեղադրվել որպես կազմակերպված հանցավոր խմբի անդամներ: Ձերբակալվածներից 15-ը վրացիներ են: Բռնցքամարտիկը կասկածվում է ռուսաստանցի «օրենքով գող» Ռաջեն Շուլայի հետ կապ ունենալու մեջ, ով ըստ մեղադրանքի՝ Բրայթոն-Բիչից Լաս Վեգասում գործող հանցավոր խմբի ղեկավար է:
Ըստ քննության՝ խմբավորումը Նյու Յորքում զբաղվում է ապօրինի խաղերի կազմակերպմամբ: Խմբավորման անդամները նաև փորձել են կոտրել Նյու Ջերսի նահանգի Ատլանտիկ-Սիթի խաղատան համակարգը, բացի այդ, քննությունը տեղեկություն ունի, որ խումբը նպատակ ուներ գիշերային ակումբ բացել, ուր պետք է թմրանյութի առևտուր կազմակերպվեր: Մեղադրանք է ներկայացվել՝ «շորթում», «խարդախություն», «առևանգում» հոդվածներով:
