Թբիլիսիի քաղաքապետարանը ապրիլի 13-ի նիստում քննարկել է քաղաքի առջև ծառացած մի շարք խնդիրներ:
Քաղաքապետ Դավիթ Նարմանիան առաջ է քաշել Թբիլիսիի մի շարք ճանապարհների վերակառուցման ծրագրերը:
«Մոտ ապագայում կապիտալ վերականգնողական աշխատանքներ կսկսվեն Աբաշիձե, Բարնով, Նուցուբիձե, Ժղենտի եւ Չարգալի փողոցներում: Սրանք քաղաքի համար ռազմավարական նշանակության փողոցներ են, որոնք միևնույն ժամանակ խիստ ծանրաբեռնված են»:
Նարմանիան նշեց նաև, որ հարցի առնչությամբ համապատասխան հանձնարարություններ է տվել համայնքների ղեկավարներին և ընդհանրապես գործում ներգրավված իրավասու մարմիններին:
Քաղաքապետը խոսեց նաև միջոցառումներն ամենակարճ ժամկետներում ու արդյունավետ իրականացնելու անհրաժեշտության մասին: Նարմանիան նաև նշեց, որ այդ աշխատանքների մասին պետք է պարբերաբար տեղեկատվություն տարածել` ավտոճանապարհներին դժվարություններից եւ խնդիրներից խուսափելու նպատակով:
Քաղաքային իշխանության ղեկավարը խոսեց նաև նոր մանկապարտեզներ հիմնելու ծրագրի մասին: 2017 թվականին կտրվի 13 մանկապարտեզի կառուցման մեկնարկը: Դրանք կկառուցվեն հատկապես քաղաքի այն շրջաններում, որտեղ նախակրթարանների կարիքն այսօր առավել շատ է զգացվում: Նարմանիայի խոսքով` մանկապարտեզները ժամանակակից կահավորում կունենան:
Հատկանշական է, որ 2016 թվականին քաղաքապետարանը նախատեսել է ավարտել թվով 10 նոր մանկապարտեզի կառուցման աշխատանքները:
Դավիթ Նարմանիան անդրադարձավ նաև վերջին ժամանակահատվածում քաղաքապետարանի դեմ արշավ սկսած անհատների գործունեությանը:
«Որոշ ընդդիմադիրներ կառավարության դեմ պրովակացիա են սկսել ` իրբև թե քաղաքացիների խնդիրներն են դրանով ուզում լուծել: Կոչ եմ անում քաղաքացիներին` չտրվել այդ սադրանքներին, չմիանալ այդ գործընթացներին, քանի որ այդ ամենը չի արվում նրանց կյանքն ու ապրուստը բարելավելու համար: Որոշ մարդիկ այս քարոզչությամբ կոնկրետ քաղաքական նպատակներ են հետապնդում»:
