«Չինական նավահանգստի կառուցման ծրագրերը քաղաքական իրարանցում են առաջացնում նախկին խորհրդային երկրում». այս վերտառությամբ հոդված է հրապարակել ամերիկյան ազդեցիկ The New York Times պարբերականը։
Ազդեցիկ պարբերականը գրել է, որ «Վրացական երազանք»-ի կողմից Անակլիայի խոր ծովային նավահանգիստը չինական ընկերությանը փոխանցելը համատարած վրդովմունք է առաջացրել։
«Ավելի քան մեկ տարի Վրաստանում՝ Ռուսաստանին սահմանակից նախկին խորհրդային հանրապետությունում, արևմտամետ բողոքի երթերի մասնակիցները մեղադրում են իրենց կառավարությանը երկրի նկատմամբ վերահսկողությունը Մոսկվային վերահաստատելու թույլտվության համար: Բայց, ճանապարհորդելով 3,6 միլիոնանոց երկրով, պարզ է դառնում մեկ այլ հավակնոտ ուժի ազդեցությունը։ Վերջին տարիներին Չինաստանն ակտիվացրել է իր գործունեությունը տարածաշրջանում՝ կառուցելով ենթակառուցվածքներ և ընդլայնելով առևտրային ուղիները՝ հույս ունենալով խթանել իր տնտեսությունը», — գրել է հոդվածի հեղինակը։
Հոդվածի հեղինակ Իվան Նեչեպուրենկոն գրել է, որ Վրաստանի հյուսիսում China Railway Tunnel Group չինական ընկերությունը կառուցում է 5,5 մղոն երկարությամբ թունել՝ Ռուսաստանին միացնող մայրուղին ընդլայնելու համար։
«Երկրի արևմուտքում նախապատրաստական աշխատանքներ են տարվում չինական մեկ այլ ընկերության՝ China Communications Construction Company-ի համար, որը կկառուցի Վրաստանի առաջին խորջրյա նավահանգիստը Սև ծովում՝ որպես Պեկինի «Գոտի և ճանապարհ» ենթակառուցվածքի և առևտրային նախաձեռնության մաս», — նշված է հոդվածում:
The New York Times-ի հրապարակած հոդվածում նշված է նաև, որ նավահանգիստն այս փուլում անուն չունի, թեև դա բանավեճի առարկա է երկրի ներսում և արտերկրում՝ «հաշվի առնելով տարածաշրջանում Չինաստանի ազդեցության աճը և երկրի՝ Արևմուտքից շրջվելը».
«Իրավիճակը սրում է նաև այն փաստը, որ նախագիծը խլվել է վրացական, եվրոպական և ամերիկյան մի խումբ ընկերություններից՝ Անակլիայի զարգացման կոնսորցիումից և ի վերջո անցյալ տարվա մայիսին խոստացվել է չինական ընկերությանը։ Անցյալ տարվա հուլիսին ԱՄՆ Պետդեպարտամենտի պաշտոնյան ասաց, որ նավահանգստի նախագծի շնորհումը չինական ընկերությանը անհամատեղելի է Միացյալ Նահանգներում և Եվրամիությունում տեղակայված միջազգային կազմակերպություններին միանալու երկրի ցանկության հետ»:
Ընդարձակ հոդվածում նշված է, որ նավահանգստի շուրջ ստեղծված իրավիճակն ընդգծում է տարածաշրջանում ԱՄՆ-ի և Ռուսաստանի աճող մրցակցությունը, թեև «Ռուսաստանը, որը դեռ համարվում է Վրաստանի հիմնական առևտրային գործընկերը, կարող է դառնալ նախագծի հիմնական շահառուներից մեկը»։
«Չինաստանի համար նավահանգիստը կդառնա դարպաս դեպի Կովկաս՝ Ասիան «Միջին միջանցքով» կապելով Եվրոպայի հետ։ Դա չինական ընկերություններին թույլ կտա իրենց ապրանքները Չինաստանից երկաթուղով Կենտրոնական Ասիայով և Կասպից ծովով տեղափոխել Եվրոպա: Ռուսաստանը, որը մինչ այժմ համարվում է Վրաստանի հիմնական առևտրային գործընկերը, կարող է դառնալ նախագծի գլխավոր շահառուներից մեկը։ Նավահանգստի շուրջ ստեղծված իրավիճակը ցույց է տալիս, թե ինչպես է աճում Չինաստանի և ԱՄՆ-ի մրցակցությունը տարածաշրջանում, և դա տապալում է Վրաստանի նման փոքր երկրներին», — ասված է հոդվածում։
