Վրաստանում «Վրացական երազանք»-ի կառավարման տարիներին իրանական ընկերությունների թիվն աճել է աննախադեպ արագությամբ։ Սրա մասին տվյալներ է հրապարակել «Թրանսփարենսի Ինթերնեշնլ-Վրաստան» (TI) հասարակական կազմակերպությունը (ՀԿ):

Կազմակերպությունը հայտնել է, որ 2013-2024 թվականներին «Վրացական երազանք»-ը ոչ միայն տնտեսական հարաբերություններն է սերտացրել իսլամական ​հանրապետության հետ, այլ նաև` քաղաքական։

Վերջին 12 տարիների ընթացքում Իրանի հետ Վրաստանի տնտեսական հարաբերությունները զգալիորեն աճել են.

• 2000-2012 թվականներին Վրաստանում Իրանի քաղաքացիները գրանցել են 2370 ընկերություն, իսկ 2013-2024 թվականներին թիվը աճել է չորս անգամ՝ 9300 ընկերություն։
• 2012 թվականին Իրանից եկել է 82 հազար 885 այցելու, իսկ 2024 թվականին այդ թիվը կրկնապատկվել է՝ հասնելով 145 հազար 670 այցելուի։
• 2001-2012 թվականներին Իրանից ուղղակի ներդրումները կազմել են 8 միլիոն դոլար, իսկ 2013-2024 թվականներին աճել է հինգ անգամ՝ հասնելով 40 միլիոն դոլարի։
• 2012 թվականին Իրանի հետ Վրաստանի ապրանքաշրջանառությունը կազմել է 119 միլիոն դոլար (արտահանումը՝ 19 միլիոն դոլար, ներմուծումը ՝ 101 միլիոն դոլար), իսկ 2024 թվականին՝ 2,7 անգամ ավելի՝ 322 միլիոն դոլար (արտահանումը՝ 37 միլիոն դոլար, ներմուծումը՝ 285 միլիոն դոլար)։

Տնտեսական հարաբերությունների խորացմանը զուգընթաց` «Վրացական երազանք»-ի կառավարությունը նաև քաղաքականապես է մտերմացել Իրանի կառավարության հետ։ 2024 թվականին «Վրացական երազանքի»-ի վարչապետ Իրակլի Կոբախիձեն մասնակցել է Իրանի հանգուցյալ նախագահ Էբրահիմ Ռաիսիի հուղարկավորությանը և նոր նախագահի՝ Մասուդ Ֆեզեշքիանի երդմնակալության արարողությանը։

Փորձագետների գնահատմամբ` «Վրացական երազանք»-ը Վրաստանի իրական, տասնյամյակներով բարեկամ Եվրոպային փոխարինում է Ռուսաստանով, Չինաստանով, Իրանով, ինչը, ըստ նրանց, վտանգի տակ է դնում երկրի ժողովրդավարությունն ու տնտեսությունը։