«Վրացական երազանք»-ի նախաձեռնած օրենսդրական փոփոխություններն ակնհայտորեն հակասում են խոսքի ազատության ոլորտում միջազգային չափանիշներին, նշել է «Թրանսփարենսի Ինթերնեշնլ-Վրաստան» (TI) հասարակական կազմակերպությունը (ՀԿ):
TI-ի գնահատմամբ, նոր օրենսդրական նախաձեռնությունն ավելի կվատթարացնի Վրաստանում քննադատող լրատվամիջոցների վիճակը։ Ըստ կազմակերպության՝ նախատեսվող օրենսդրական փոփոխությունները ծառայում են երեք նպատակի.
- Թուլացնել կամ ամբողջությամբ վերացնել անկախ հեռարձակվող լրատվամիջոցները՝ սահմանափակելով նրանց ֆինանսական եկամուտների աղբյուրները։
- Լրատվամիջոցներում գրաքննություն կամ ինքնագրաքննություն իրականացնել, իսկ քննադատական ալիքների արտադրության վրա բովանդակային վերահսկողություն սահմանել։ Գրաքննության գործառույթը փոխանցվելու է հաղորդակցության հանձնաժողովին, մի մարմնի, որը տարիների ընթացքում բազմիցս ապացուցել է իր կողմնակալությունը հօգուտ իշխանության և ի վնաս անկախ լրատվամիջոցների։
- Ստեղծել նպաստավոր պայմաններ ռուսական և հակաարևմտյան քարոզչության և ապատեղեկատվության տարածման համար՝ թուլացնելով կամ իսպառ վերացնելով անկախ հեռուստաալիքները մեդիա տարածությունից, ինչպես նաև սահմանափակումներ մտցնելով արևմտյան մեդիա ծրագրերի վրա. «շահեկան» վիճակում կհայտնվեն այն հեռուստաալիքները, որոնցից հեռուստադիտողները հիմնականում ստանում են ապատեղեկատվություն և հակաարևմտյան հռետորաբանություն:
Ի դեպ, հեռարձակողներին էլ ավելի սահմանափակելու համար «Վրացական երազանք»-ը ևս մեկ օրինագիծ է նախաձեռնել։ Փոփոխությունները, որոնք պետք է ներառվեն «Հեռարձակման մասին» օրենքում, կազդեն հեռուստատեսության և ռադիոկայանների վրա։
Այս օրենսդրական փոփոխություններով Վրաստանի հաղորդակցության հանձնաժողովը (ComCom) իրավունք կունենա քննարկել հարցեր, որոնք նախկինում եղել են ինքնակարգավորման շրջանակում, և կարող է տուգանել հեռուստատեսություններին և ռադիոկայաններին։
Գրաքննություն ՀԸ-ներում և ռադիոյում. իշխող ուժի հերթական ռեպրեսիվ օրինագիծը
