Վրաստանի ներքին գործերի նախարարությունը (ՆԳՆ) վարչական իրավախախտման վերաբերյալ հաղորդումներ է ներկայացրել եվրոպամետ ցույցերը լուսաբանող մի քանի լրագրողների նկատմամբ՝ նրանց մեղադրելով ճանապարհը փակելու մեջ։ Նրանցից յուրաքանչյուրին սպառնում է 5000 լարիի տուգանք:
Վրաստանի «Լրագրողական էթիկայի խարտիա»-ն կազմել է հանրահավաքում աշխատող լրագրողների ցուցակը, ովքեր մեղադրվում են ՆԳՆ-ի կողմից։ Ոստիկանությունը ճանապարհը փակելու մեջ է մեղադրում
- Studio Monitor-ի լրագրող Նինո Շուբիթիձեն, փետրվարի 17-ին,
- Studio Monitor-ի լրագրող Նինո Ծվերավան, փետրվարի 17-ին,
- TV Pirveli-ի ֆոտոօպերատոր և օպերատոր Գիորգի Մոսիաշվիլի, հաղորդվել է փետրվարի 21-ին,
- Publica-ի լրագրող Բաստի Մգալոբլիշվիլի, փետրվարի 14-ին,
- Tabula-ի լրագրող Բեքա Ջիքուրաշվիլի, փետրվարի 14-ին,
- Tabula-ի լրագրող Նիկոլոզ Շիրակաձե, հունվարի 17-ին,
- «Մթավարի արխի»-ի լրագրող Նաթիա Գոգսաձե, փետրվարի 2-ին,
- «Մթավարի արխի»-ի լրագրող Ալեքսանդրե Սաջաիա, հունվարի 4-ին,
- «Մեդիա Ապրիլի»-ի ֆոտոլրագրող Վախո Քարելի, հունվարի 26-ին,
- «Ազատություն ռադիոկայան»-ի լրագրող Էկա Քևանիշվիլի, հունվարի 22-ին,
- Euronews-ի լրագրող Դավիթ Կեկենաձե, հունվարի 3-ին,
- «Ազատություն ռադիոկայան»-ի լրագրող Սալոմե Չադունելի, նոյեմբերի 10-ին,
- «Մեցխրե տալղա» հեռուստաընկերության ղեկավար Գերմանե Սալիա, դեկտեմբերի 13-ին:
«Այս ամենը կամ միտումնավոր քաղաքականության արդյունք է, որն ուղղված է լրագրողների աշխատանքային միջավայրի հետագա վատթարացմանը և նրանց գործունեության շրջանակը սահմանափակելուն, կամ, լավագույն դեպքում, լուրջ համակարգային խնդիր է, որին պետք է շտապ արձագանքեն ՆԳՆ-ն և դատական համակարգը», — ասված է խարտիայի հայտարարության մեջ։
Արդեն 86 օր է՝ նոյեմբերի 28-ից, Թբիլիսիում և այլ քաղաքներում ընթանում են եվրոպամետ ցույցեր։ Բողոքի շարունակական ալիքը հաջորդեց «Վրացական երազանք»-ի այն հայտարարությանը՝ որոշել են մինչև 2028 թվականը օրակարգ չբերել Եվրամիության հետ անդամակցության բանակցությունների բացման հարցը:
Ցուցարարներն իրենց բողոքն արտահայտում են երթերով և ելույթներով։ Նրանք պահանջում են նոր խորհրդարանական ընտրություններ անցկացնել և ազատ արձակել ձերբակալվածներին:
