«Վիվամեդ» կլինիկայի տնօրեն Զուրա Չխաիձեն «Մթավարի արխի» հեռուստաալիքի եթերում զրույցի ընթացքում հայտնել է, որ «Նեթգազեթի» և «Բաթումելեբի» լրատվամիջոցների հիմնադիր Մզիա Ամաղլոբելիի առողջական վիճակը կայուն է, և նա շարունակում է գտնվել բժշկի հսկողության տակ։

«Առողջական վիճակը նույնն է։ Նա հետևում է բժշկի խորհուրդներին, գտնվում է բժշկի վերահսկողության ներքո և անցնում է կրկնակի հետազոտություն՝ ըստ անհրաժեշտության»,- ասել է Չխաիձեն։

Կլինիկայի տնօրենի խոսքով՝ բժիշկներն այս փուլում խորհուրդ չեն տալիս Մզիա Ամաղլոբելիին կալանավայր վերադարձնել։

«Մենք զրուցել ենք նրա հետ (նկատի ունի Ամաղլոբելիին- հեղ.), բացատրել ենք իրավիճակը», – ասել է Զուրա Չխաիձեն։

Հիշեցնենք, Մզիա Ամաղլոբելին փետրվարի 4-ին տեղափոխվել է «Վիվամեդ» կլինիկա, և արդեն 30 օր է, ինչ հացադուլի մեջ է։

Ամաղլոբելիին մեղադրանք է առաջադրվել Քրեական օրենսգրքի 353-րդ հոդվածի առաջին մասով` ոստիկանի նկատմամբ բռնության գործադրում։ Հոդվածը նախատեսում է ազատազրկում 4-ից 7 տարի ժամկետով։