«Վրացական երազանք»-ի կառավարության արտաքին գործերի (ԱԳ) նախարար Մակա Բոճորիշվիլին փոխել է դիվանագիտական ծառայության անցնելու կանոնները։
«Վրաստանի երիտասարդ իրավաբանների ասոցիացիա» (GYLA) իրավապաշտպան կազմակերպության գնահատամամբ՝ փոփոխությունները հակասում են Սահմանադրական դատարանի որոշումներին՝ ծառայությունն ամբողջությամբ ստորադասելով կուսակցական շահերին։
Բոճորիշվիլին դիվանագիտական ծառայության անցկացման կանոններում փոփոխությունները կարարել է 2025 թվականի հունվարի 27-ին։ Այս օրենքն իր նախկին տեսքով գոյություն ուներ 2019 թվականին ընդունված հրամանի հիման վրա։
Թեև փոփոխությունը՝ «Թիվ 01-74 հրամանը», մտցվել է հունվարի 27-ին, «Օրենսդրական տեղեկագրում» փաստաթղթի հենց սկզբում սխալ է նշում այս ամսաթիվը. թվագրվում է «2025 թվականի նոյեմբերի 27»։
Քանի որ այս ամսաթիվը դեռ չի եկել, GYLA-ն կարծում է՝ այս դետալը «իրավական թյուրիմացություն է ստեղծում»։
Դիվանագիտական պաշտոններում նշանակումները հնարավոր են դարձել վարչական համաձայնագրերի միջոցով։ Փոփոխության ուժով՝ վարչական պայմանագրով կնշանակվեն.
- նախարարության գլխավոր տնօրինության գլխավոր տնօրեն,
- բաժնի տնօրեն,
- վարչության փոխտնօրեն,
- նախարարի քարտուղարության պետ:
Ըստ GYLA-ի՝ դա հակասում է Վրաստանի «Դիվանագիտական ծառայության մասին» օրենքին։ Դա պայմանավորված է նրանով, որ «Դիվանագիտական ծառայության մասին» օրենքը նշված պաշտոններում աշխատողներին չի համարում վարչական պայմանագրով աշխատող։
Բոճորիշվիլիի հրամանի արդյունքում՝ նախարարի լիազորությունների դադարեցման դեպքում ավտոմատ կերպով կլուծարվեն նաև վերոնշյալ պաշտոններում նշանակված բոլոր անձանց պայմանագրերը։
GYLA-ն ընդգծում է՝ սա քաղաքական դրդապատճառներով պաշտոնանկ անելու ուղղակի մեխանիզմ է, նշում են. «Փոփոխությունները ապօրինաբար նվազեցնում են դիվանագիտական ծառայությունում զբաղվածների անկախությունը և հանրային ծառայությունն օգտագործում քաղաքական նպատակներով»:
Իրավապաշտպան կազմակերպությունը կարծում է, որ դիվանագիտական ծառայության կանոններում կատարված փոփոխությունները «հանրային ծառայողների դեմ ուղղված բռնաճնշումների հստակ շարունակությունն են»։
Ի դեպ, 2024 թվականի վերջին՝ «Վրացական երազանք»-ի ընտրած 6-րդ նախագահ Միխեիլ Կղավելաշվիլիի ստորագրությունից հետո, ուժի մեջ են մտել «Քաղաքացիական ծառայության մասին» օրենքում խորհրդարանի ընդունած վիճահարույց փոփոխությունները։ Այս փոփոխությունները, իրավապաշտպանների կարծիքով, հեշտացրել են աշխատակիցներին քաղաքական հողի վրա աշխատանքից ազատելը: Դրանից առաջ և հետո մի շարք գործիչներ, ովքեր հրապարակայնորեն քննադատում էին «Վրացական երազանք»-ի հակաժողովրդավարական դիրքորոշումները և աջակցում էին եվրոպամետ ցույցերին, հեռացվեցին պետական ծառայությունից։
«Վրաստանի երիտասարդ իրավաբանների ասոցիացիա»-ն Բոճորիշվիլիի կատարած փոփոխությունը գնահատում է հենց այդ համատեքստում:
