Ռուսթավելիի պողոտայում շարունակվող եվրոպամետ բողոքի ցույցին զուգահեռ Ազատության հրապարակում Courtyard by Marriott Tbilisi հյուրանոցում հանդիպել են ընտրություններում անցողիկ շեմը հաղթահարած ընդդիմադիր կուսակցության առաջնորդները: Ընդդիմության հիմնական ուղերձն է՝ պայքարը պետք է շարունակել, անկախ նրանից՝ կձերբակալվեն, թե՝ ոչ։
«Կոալիցիա փոփոխությունների համար»-ի առաջնորդներից Զուրաբ Ջափարիձեն հանդիպումից հետո լրագրողներին ասել է, որ չեն վախենում ներքին գործերի նախարարության (ՆԳՆ) կողմից գրասենյակներ ներխուժելուց և ձերբակալություններից, պատրաստ են իրավական աջակցություն ցուցաբերել բոլոր բերման ենթարկվածներին:
«Բոլորիս ձերբակալելու դեպքում նույնիսկ պայքարը պետք է շարունակվի», — ասել է Ջափարիձեն:
«Միասնություն — Ազգային շարժում» կոալիցիայի առաջնորդներից Գիորգի Վաշաձեի խոսքով՝ բողոքի ցույցերը պետք է շարունակվեն՝ ողջ Վրաստանում ազդարարելով համընդհանուր անհնազանդություն։ Վաշաձեն հավելել է՝ ամեն ինչի պատրաստ են:
ՆԳՆ-ն դեկտեմբերի 4-ին խուզարկություններ է իրականացրել վրաստանյան մի շարք ընդդիմադիր կուսակցությունների, քաղաքացիական ակտիվիստների գրասենյակներում ու բնակարաններում:
Վրաստանի նախագահ Սալոմե Զուրաբիշվիլին վերջին ժամերին զարգացած իրադարձություններն անվանել է «ռեպրեսիա»։ Քաղհասարակության գնահատմամբ՝ «Վրացական երազանք»-ն այլևս ի վիճակի չէ փողոցային բողոքի ցույցերի հետ առնչվել, այժմ էլ խուճապ ու վախ է սերմանում, այդ իսկ պատճառով էլ ռեպրեսիաներ է սկսել:
