Ապրիլի 24-ին Թբիլիսիի հայ առաքելական եկեղեցիներում մատուցվեց հայոց ցեղասպանության սրբադասված անմեղ զոհերի հիշատակին նվիրված պատարագ, որին ներկա էր ՀՀ արտակարգ եւ լիազոր դեսպանը` Հայաստանի դիվանագիտական առաքելության այլ անդամներ, Թբիլիսիի հայ համայնքի ներկայացուցիչներ, խորհրդարանի պատգամավորներ:

«Ալիք Մեդիա»-ի հետ զրույցում Վրաստանի խորհրդարանի հայազգի 3 պատգամավորներից մեկը՝ իշխող  «Վրացական երազանք» կուսակցության համամասնական ցուցակով ընտրված Ռուսլան Պողոսյանը նշեց.

«Ես գալիս էի այստեղ մինչեւ պատգամավոր դառնալը, գալիս եմ նաև պատգամավոր դառնալուց հետո, ես հարգում եմ անմեղ զոհերի հիշատակը, ինքս ցեղասպանության զոհերի ժառանգ եմ: Տարիներ շարունակ դա անում են նաեւ խորհրդարանի իմ ընկերները, գործընկերները»։

Անդրադառնալով Վրաստանի կողմից հայոց ցեղասպանության ճանաչմանը, պատգամավորն ասաց.

«Այսօր մի շարք պատճառներով Վրաստանը զերծ է մնում բանաձեւ կամ ցեղասպանությանը վերաբերող որեւէ փաստաթուղթ ընդունելուց, սակայն ցեղասպանության միջազգային ճանաչման դեպքում Վրաստանը, անշուշտ, իր ներդրումը կունենա»։

Եկեղեցում էին նաեւ տարբեր հասարակական կազմակերպությունների ղեկավարներ: «Բազմազգ Վրաստան» հկ-ի ղեկավար Առնոլդ Ստեփանյանը կարծում է, որ կարեւոր չէ բողոքի ցույցի աշխարհագրական վայրը, ավելի կարեւոր է, թե ինչ են պահանջում մասնակիցները.

«Տվյալ պահին սկզբունքային չէ ցույցի վայրը, այլ այն, թե ինչքանով է արդյունավետ քայլ եւ ինչ արդյունքներ կտա: Թուրքիայի դեսպանատան առջեւ ցույց անցկացնելը պարզ պատճառներ ունի, Վրաստանի խորհրդարանի նախկին շենքի մոտ՝ նույնպես հասկանալի է, եթե պահանջում ենք իշխանություններից ճանաչել ցեղասպանությունը, սակայն սրանք բացառապես տարբեր կառույցներ են: Չի կարելի ցույց անցկացնել Վրաստանի խորհրդարանի շենքի մոտ եւ ցեղասպանության ճանաչում պահանջել Թուրքիայից»,- «Ալիք Մեդիա»-ի հետ զրույցում նշեց Առնոլդ Ստեփանյանը:

Եկեղեցում մատուցված պատարագից հետո Թբիլիսիում՝ Թուրքիայի դեսպանատան առջեւ, չնայած Թբիլիսիի քաղաքապետարանի զգուշացումներին, տեղի ունեցավ «Վրաստանի հայ համայնք» հասարակական կազմակերպության նախաձեռնությամբ արդեն ավանդույթ դարձած բողոքի ցույցը: Նախօրեին էլ անցկացվեց ջահերով երթ: Ցեղասպանության 102-րդ տարելիցին նվիրված պաշտոնական միջոցառում էր անցկացվել նաեւ «Բիլթմոր» հյուրանոցում:  Տեղի ունեցած միջոցառումները Վիրահայոց թեմի «Հայարտուն» կենտրոնի տնօրեն Լեւոն Չիդիլյանը, ընդհանուր առմամբ, դրական գնահատեց։

«Բավականին բարձր մակարդակի էին կազմակերպված բոլոր միջոցառումները, բայց, ցավոք սրտի, որոշ խոչընդոտներ կային ակցիաների հետ կապված, որ հարցեր առաջացրին համայնքում, մարդկանց մեջ որոշ չափի վախ կար՝ արդյո՞ք լինելու է ցույցը»,-ասաց Չիդիլյանը։