Թբիլիսիի մետրոյի «Ավլաբարի» (Հավլաբար) կայարանի վերին գավթի ավելի քան երկու տարի տևած վերականգնումն ավարտվել է: Թբիլիսիի քաղաքապետ Կախա Կալաձեն այդ մասին տեղեկացրել է քաղաքային կառավարության նիստում։
Վերականգնողական աշխատանքները սկսվել էին 2022 թվականի հուլիսի 20-ին, պետք է ավարտվեին 8 ամսում, սակայն դրանք տևեցին 28 ամիս։
«Ավլաբարի»-ի մետրոյի վերականգնման համար 4,2 մլն լարիի պայմանագիր առանց մրցույթի «Բադա Գրուպ» ՍՊԸ-ի («Բադա Քոնսթրաքշն») հետ կնքվել է 2022 թվականի հուլիսի 17-ին։ Վերականգնման մեկամյակի օրը՝ 2023 թվականի հուլիսին, կապալառուի պայմանագիրը երկարաձգվեց մինչև 2024 թվականի մարտի 15-ը։
2024 թվականի փետրվարի 1-ին Կալաձեն հայտնել էր, որ մետրոյի «Ավլաբարի» կայարանի վերին գավթի վերականգնումը պետք է ավարտվեր մինչև ամառվա վերջ, սակայն աշխատանքները կրկին հետաձգվեցին։
Նույն ընկերությունն իրականացնում է նաև մետրոյի «Վարկեթիլի» կայարանի վերականգնման աշխատանքները։ Տվյալ դեպքում 13,4 մլն լարիի չափով պայմանագիրը կնքվել է առանց մրցույթի՝ 2022 թվականի դեկտեմբերի 21-ին։
Աշխատանքների մեկնարկից անցել է երկու տարի, սակայն դեռ հայտնի չէ, թե աշխատանքները երբ կավարտվեն։ Ասբեստի սալիկները հանվել են մետրոյի կայարանի թունելի և հարթակի աշխատանքների մեկնարկի առաջին շաբաթներին։
Մետրոպոլիտենի «Գորցիրիձե» կայարանը նույնպես բացվել է նախատեսված ժամկետից ուշ։ Աշխատանքները, որոնց համար նախատեսված էր յոթ ամիս, տևել են գրեթե երեք տարի։
