«Վրաստանի երիտասարդ իրավաբանների ասոցիացիա»-ի (GYLA) կարծիքով` եթե Վրաստանի խորհրդարանը ճանաչի նոր անդամների լիազորությունները, դրանով իսկ կխախտի Սահմանադրությունը և խորհրդարանի կանոնակարգը։
Ասոցիացիան պարզաբանում է` ըստ օրենսդրության, խորհրդարանի առաջին նստաշրջանում ստեղծվում է ժամանակավոր մանդատային հանձնաժողով, որը ԿԸՀ-ի նախագահի ներկայացրած պատգամավորների լիազորությունների ճանաչման համար անհրաժեշտ փաստաթղթերի ուսումնասիրության հիման վրա լիազորությունների ճանաչման նպատակով արտացոլում է ընտրված պատգամավորների անունները։ Փաստաթղթում չի նշվում այն անձի անուն-ազգանունը, որի ընտրության օրինականությունը վիճարկվում է Սահմանադրական դատարանում։
«Նոր խորհրդարանը լիակատար լիազորություններ է ձեռք բերում խորհրդարանի ամբողջական կազմի երկու երրորդի (100 անդամ) ճանաչման պահից։ Եթե պարզվի, որ խորհրդարանի այն անդամների թիվը, որոնց իրավասությունը ճանաչվել է օրենսդիր մարմնի կողմից, պակաս է խորհրդարանի ամբողջական կազմի երկու երրորդից` լիագումար նիստը դադարեցվում է։
Վրաստանի նախագահը հայցով դիմել է Սահմանադրական դատարան՝ ընտրությունների արդյունքները հակասահմանադրական ճանաչելու պահանջով։ Ըստ այդմ, այս հայցը վիճարկում է բոլոր 150 անդամների ընտրության օրինականությունը: Այսպիսով, Վրաստանի խորհրդարանը չի կարող ճանաչել ընտրված անդամների լիազորությունները, քանի դեռ չի ավարտվել վեճը Սահմանադրական դատարանում»,- ասված է հայտարարության մեջ։
GYLA-ն խորհրդարանին կոչ է անում «հնազանդվել Վրաստանի Սահմանադրության պահանջին, դադարեցնել նիստը և չճանաչել նոր խորհրդարանի լիազորությունները, քանի դեռ Սահմանադրական դատարանը որոշում չի կայացրել նախագահի հայցի վերաբերյալ»։
Կարդացեք նաև`
