Թբիլիսիի քաղաքային դատարանը նոյեմբերի 19-ի բողոքի ակցիայի ժամանակ բերման ենթարկված Իրակլի Անդղուլաձեին տուգանել է 2700 լարիի չափով։ Նոյեմբերի 20-ին կայացել է նաև մեկ այլ բերման ենթարկվածի՝ Իսակո Դևիձեի դատավարությունը. նա դատապարտվել է 8-օրյա ազատազրկման։
Նշված երկուսի շահերը դատարանում պաշտպանել է «Երիտասարդ իրավաբանների ասոցիացիա» (GYLA) հասարակական կազմակերպությունը (ՀԿ)։ Բերման ենթարկվածների փաստաբան Ջուբա Քատամաձեն նշել է՝ երկուսն էլ մեղադրվում են հանրահավաքի ժամանակ ոստիկանության պահանջներին չենթարկվելու համար (Վարչական իրավախախտումների վերաբերյալ օրենսգրքի 173-րդ հոդված)։
Նոյեմբերի 19-ին Թբիլիսիի պետական համալսարանի հարակից տարածքը ցուցարարներից ազատագրելու ժամանակ բերման է ենթարկվել 16 խաղաղ ցուցարար։
Նրանցից երեքը՝ երկու ցուցարար և «Մթավարի արխի» ՀԸ-ի օպերատորը, ազատ են արձակվել ստորագրությունների հիման վրա։
