Վրաստանի կառավարության կողմից ցանկություն լինելու դեպքում մենք կրկին ԵՄ-ին մերձենալու հստակ ճանապարհ կառաջարկենք, ԵՄ ընդլայնման վերաբերյալ զեկույցի ներկայացումից առաջ ունեցած ելույթում ասել է ԵՄ բարձր ներկայացուցիչ Ժոզեպ Բորելը:
Բորելն ասել է՝ վերջին ամիսներին տեսնում են վրացական իշխանությունների կողմից համախմբված միտում, որ երկիրը հեռանում է եվրոպական ուղուց, նրա արժեքներից և սկզբունքներից։
«Մեր զեկույցում ուրվագծվում է կրկին մերձեցման հստակ ուղի, եթե կա վրացական իշխանությունների քաղաքական կամք, մենք առաջարկում ենք հստակ ճանապարհ, որպեսզի մերձեցումը կրկին տեղի ունենա։ «Օտարերկրյա թափանցիկության ազդեցության մասին» օրենքի չեղարկումը, որը բացասական ազդեցություն ունեցավ քաղաքացիական հասարակության և լրատվամիջոցների վրա, և նույնը վերաբերում է «Ընտանեկան արժեքների մասին» օրենքին. սա կլինի Վրաստանի կողմից համապատասխան քայլերի առաջին ցուցումը»,- ասել է Բորելը:
Բորելը խոսել է Վրաստանում կայացած խորհրդարանական ընտրությունների մասին՝ նշելով, որ անկախ դիտորդների կարծիքով՝ ընտրություններն ազատ ու արդար չեն եղել: Նա կրկնել է՝ ընտրությունների արդյունքը պետք է ուսումնասիրվի։
«Վրաստանում խորհրդարանական ընտրություններում լուրջ խախտումներ կան, որոնք պետք է հետաքննվեն թափանցիկ և անկախ: Ես չեմ թվարկի այդ խախտումները, բայց դրանք շատ են, և կարևոր է ընդգծել, որ անկախ դիտորդները չեն նշել, որ ընտրություններն անցել են ազատ և թափանցիկ, և սա պահանջում է հետաքննություն՝ պարզելու համար, թե ինչ է տեղի ունեցել, ինչ չափով են եղել խախտումները և ինչպես է դա ազդել արդյունքների վրա… Շատ կարևոր է հետևել իրադարձություններին, որոնք տեղի կունենան առաջիկա օրերին, սպասել ընտրությունների հետաքննությանը և այն խախտումները, որոնք բացահայտվել են դիտորդական առաքելության կողմից»,- ասել է Բորելը։
