ԱՄՆ պետքարտուղար Էնթոնի Բլինքենն արձագանքել է Վրաստանում «գործակալների օրենքի» ընդունմանը՝ ասելով, որ ԱՄՆ-ն ի պատասխան «կգործի»: Բլինքենի խոսքով, ««գործակալների օրենքը» պատճենված է մոսկովյան տարբերակից»։
Նա կրկնել է՝ ԱՄՆ-ին անհանգստացնում է Վրաստանում ընդունված «օտարերկրյա գործակալների մասին օրենքը»:
«Կարծում եմ, ցավոք, դա պատճենված է Մոսկվայի տարբերակից և հակասում է Վրաստանի բնակչության մեծամասնության ցանկությանը՝ շարունակել շարժվել դեպի Եվրամիություն, դեպի Եվրոպական ինտեգրում»,- ասել է Բլինքենը։
Ի դեպ, մայիսի 21-ին Վենետիկի հանձնաժողովը հրապարակեց իր բացասական եզրակացությունը «Օտարերկրյա ազդեցության թափանցիկության մասին» վրացական օրենքի վերաբերյալ: Հանձնաժողովը կառավարությանը «խստորեն խորհուրդ է տալիս» չեղարկել «գործակալների մասին օրենքը» ներկայիս տեսքով։ Վրաստանի իշխող «Վրացական երազանք» կուսակցությունը սակայն, հանձնաժողովի կարծիքն անհիմն է որակում: ԵՄ արտաքին քաղաքականության և անվտանգության բարձր ներկայացուցիչ Ժոզեպ Բորելը կոչ է անում չանտեսել Վենետիկի հանձնաժողովի եզրակացությունը:
