Լիտվայի արտաքին գործերի նախարար (ԱԳ) Գաբրիելիուս Լանդսբերգիսն արձագանքել է Վրաստանի խորհրդարանի նախագահ Շալվա Պապուաշվիլիի հայտարարությանը, թե ԵՄ բոլոր ԱԳ նախարարները համակարծիք են Վրաստանի կառավարության ձեռնարկած քայլերի ողջամտության հարցում։
Լանդսբերգիսը X սոցիալական ցանցում հերքել է Պապուաշվիլիի հայտարարությունը. «Հարկ եմ համարում պարզաբանել, որ մենք համաձայն չենք,թե Վրաստանը ճիշտ արեց՝ անտեսելով եվրոպական խորհուրդներն ու արժեքները։ Մենք արտահայտեցինք չափազանց ուժեղ տեսակետներ, այլ ոչ թե «որոշակի մտահոգություններ»:
Էստոնիայի արտաքին գործերի նախարար Մարգուս Ցահնկան նշել է, որ իրենք համաձայնության չեն եկել նման հարցի շուրջ, և ինքը հակառակ ուղերձն ունի՝ «Վրաստանը ճիշտ ուղղությամբ չի գնում»։
Ի դեպ, Վրաստանում են Լիտվայի, Էստոնիայի, Իսլանդիայի և Լատվիայի արտգործնախարարները։ Նրանք հանդիպել են խորհրդարանի նախագահ Շալվաա Պապուաշվիլիի հետ։ Հանդիպմանը քննարկված թեմաներից էր մայիսի 14-ին Վրաստանի խորհրդարանում երրորդ ընթերցմամբ ընդունված «գործակալների մասին օրենքը»։
Իշխող «Վրացական երազանքը» երրորդ ընթերցմամբ ընդունել է «ռուսական օրենքը»՝ հանրային լայնածավալ բողոքի ակցիաների և արևմտյան գործընկերների քննադատության ֆոնին։ Վրաստանի խորհրդարանը «գործակալների մասին օրենքն» ուղարկել է նախագահ Սալոմե Զուրաբիշվիլիի ստորագրությանը: Հայտնի է, որ Զուրաբիշվիլին մտադիր է վետո դնել այս օրենքի վրա։
