Միջազգային իրավապաշտպան Amnesty International կազմակերպությունը ընդարձակ հայտարարությամբ արձագանքում է Վրաստանի խորհրդարանում «գործակալների մասին օրենքի» վերսկսմանը և այս վիճահարույց օրենքի նախագծի դեմ բողոքին։ Կազմակերպությունը բողոքի ակցիան համարում է միանշանակ խաղաղ, իսկ պետության կողմից ուժի կիրառումը միանշանակ անօրինական է։
«Ոստիկանությունը և անվտանգության ուժերը պետք է հարգեն միջազգային օրենքներն ու չափորոշիչները ուժ կիրառելիս: Խաղաղ ցուցարարների նկատմամբ ուժի անհամաչափ կիրառման մասին դեպքերը, ներառյալ քիմիական գրգռիչների, ջրցան մեքենաների և ռետինե փամփուշտների կիրառման դեպքերը, պետք է անհապաղ, անկախ և անաչառ հետաքննվեն: Կասկածյալ պետական պաշտոնյաները պետք է ձերբակալվեն», — գրում է կազմակերպությունը և կոչ անում Վրաստանի կառավարությանը հրաժարվել շարունակել «գործակալների մասին օրենքի» վերանայումը, ինչը կտրուկ կվատթարացնի Վրաստանում արտահայտվելու ազատության առումով իրավիճակը։
Ըստ Amnesty International-ի՝ ապրիլի 15-ից հետո, երբ քաղաքացիները սկսեցին ակտիվորեն բողոքել աղմկահարույց օրենքի նախագծի դեմ, ոստիկանությունը ուժ է կիրառել ցուցարարների նկատմամբ: Կազմակերպությունը կասկածելի է համարում ապրիլի 15-ի և 16-ի բողոքի ակցիաների ժամանակ քաղաքացիների բերման ենթարկելու անհրաժեշտությունը և ընդգծում է, որ այս օրերին մի շարք լրատվամիջոցների ներկայացուցիչներ են վիրավորվել։
«Վրացական ոստիկանության գործողություններն ակնհայտորեն չեն համապատասխանել միջազգային չափանիշներին, հատկապես՝ ապրիլի 30-ից մայիսի 3-ը: Ոստիկանության հրամանները չկատարելու կամ հասարակական կարգի խախտման մանր դեպքերը չեն արդարացնում խաղաղ ցույցերի դեմ քիմիական գրգռիչ նյութերի, ջրցան մեքենաների կամ ռետինե փամփուշտների օգտագործումը։
Ոչինչ չի արդարացնում ցուցարարներին ծեծելը կամ անազատության մեջ գտնվող մարդկանց նկատմամբ բռնությունը։ Իշխանությունների պատժիչ գործողությունները խաղաղ ցուցարարների նկատմամբ հստակ ցույց են տալիս, որ նպատակն է՝ պատժել խաղաղ ցուցարարներին և կանխել հետագա բողոքի ակցիաները, ինչը խախտում է խաղաղ հավաքների իրավունքը»,- գրել է կազմակերպությունը։
Թբիլիսիում իրավիճակը շարունակում է լարված մնալ։ Վերջին 2 շաբաթվա ընթացքում Թբիլիսիում շարունակական, լայնածավալ բողոքի ցույցեր են ընթանում ընդդեմ «ռուսական օրենք» անունը ստացած «գործակալների մասին օրենքի»։ Իշխանությունը ջրցան մեքենաներ, արցունքաբեր գազ, «պղպեղի սփրեյ» և ռետինե փամփուշտներ է օգտագործում խաղաղ ցուցարարների դեմ։
Ցուցարարները շարժվում են «Վրացական երազանքի» գրասենյակ. բերման ենթարկված կա
