Թբիլիսիի քաղաքապետարանը խորհրդարանի մոտ շարունակվող բողոքի ցույցը «չարտոնված» է որակել:
Ընդգծենք՝ հավաքների և ցույցերի իրավունքը երաշխավորված է Վրաստանի Սահմանադրությամբ, իսկ հանրահավաքի անցկացումը հատուկ թույլտվություն չի պահանջում։
Միաժամանակ՝ խորհրդարանի երկու կողմերում և Ազատության հրապարակում մոբիլիզացված են ներքին գործերի նախարարության (ՆԳՆ) հատուկ հանձնարարությունների դեպարտամենտի աշխատակիցները։
«Կոչ ենք անում զերծ մնալ սադրանքներից և հնարավորություն տալ ապրիլի 29-ին նախատեսված միջոցառման կազմակերպիչներին իրականացնել իրենց աշխատանքը:
Ապրիլի 22-ին «Վրացական երազանք»-ը նամակ է հղել Թբիլիսիի քաղաքապետարան՝ ապրիլի 29-ին նախատեսված հանրային հանդիպման վերաբերյալ։ Հանդիպման մասշտաբներով պայմանավորված՝ կազմակերպիչները նախատեսել էին նախապատրաստական աշխատանքները սկսել երեք օր առաջ և խնդրել էին օրենքով նախատեսված տարբեր միջոցառումներ իրականացնել։ Օրենքով նախազգուշացում կա, որ ապրիլի 27-ից մինչև ապրիլի 30-ը «Վրացական երազանք»-ը զբաղեցրել է խորհրդարանի հարակից տարածքը, որտեղ տեղադրվում է թեթև շինարարական բեմ, տեղադրվում են էկրաններ և տարբեր սարքավորումներ»,- հայտարարել է Թբիլիսիի քաղաքապետարանը:
Ուշ երեկոյան ցուցարարները կոտրել են խորհրդարանի մոտ կանգնեցված բարիկադները, որոնք հսկում էին ոստիկանները։ Այդ ժամանակ ոստիկանությունը հատուկ միջոցներ՝ արցունքաբեր գազ և «պղպեղի սփրեյ» է կիրառել: ՆԳՆ-ն հաստատել է հատուկ միջոցների կիրառումը, թեպետ կոնկրետ չի նշել, թե ինչ միջոցներ։
Ազատության հրապարակում մոբիլիզացված է ոստիկանական տեխնիկա: «Ակցիայի մասնակիցները տեղում բանավոր և ֆիզիկապես առերեսվում են իրավապահների հետ»,- հայտնել են ՆԳՆ-ից։
ՆԳՆ-ն հանրահավաքի կազմակերպիչներին, կուսակցության ղեկավարներին և մասնակիցներին կոչ է արել ենթարկվել իրավապահների օրինական պահանջներին և չգերազանցել բողոքի արտահայտման համար օրենքով սահմանված նորմերը:
