Վրաստանի իշխող «Վրացական երազանք» կուսակցության խորհրդարանական մեծամասնությունը դիմել է ԱՄՆ դեսպանատուն՝ դատավորների նկատմամբ պատժամիջոցները վերացնելու խնդրով։ Ապրիլի 1-ին կայացած մեծամասնության նիստից հետո կուսակցության գրասենյակում այս տեղեկությունը հայտնել է խորհրդարանական մեծամասնության ղեկավար Մամուկա Մդինարաձեն։
«Խորհրդարանական մեծամասնության անունից ցանկանում ենք դիմել մեր գործընկեր և բարեկամ դեսպանատան տեղական ներկայացուցչությանը, տիկին դեսպանին, և հուսով ենք, որ այդ հարցը օբյեկտիվորեն կլուծվի նրա դեսպանության օրոք, զրույց սկսելու և պատժամիջոցները, որ դատավորների նկատմամբ սահմանել են նահանգները՝ վերացվեն: Առայժմ մենք չենք տեսել որևէ ապացույց, որը կհաստատի այդ պատժամիջոցների անհրաժեշտությունը, էլ չասած՝ պատժամիջոցների համար որևէ պայման և փաստացի հիմք», — ասել է Մդինարաձեն։
Ըստ նրա՝ «այն փաստը, որ Վրաստանում մի քանի դատավորներ պատժամիջոցների են ենթարկվում առանց որևէ հիմքի, ավելացնում է դատարանի դեմ այն ստոր արշավը, որին դիմում են ՀԿ սեկտորի և «Միացյալ ազգային շարժման» և նրա տարբեր ճյուղերի շարքային ներկայացուցիչները»:
Ի դեպ, 2023 թվականի ապրիլի 5-ին ԱՄՆ-ը որոշում է կայացրել վիզային պատժամիջոցներ կիրառել Վրաստանի երեք ներկա և մեկ նախկին դատավորների նկատմամբ։ Նրանք են` Թբիլիսիի վերաքննիչ դատարանի նախագահ Միխեիլ Չինչալաձեն, Արդարադատության բարձրագույն խորհրդի անդամ և վերաքննիչ դատարանի դատավոր Լևան Մուրուսիձեն, Թբիլիսիի վերաքննիչ դատարանների փոխնախագահ Իրակլի Շենգելիան, Թբիլիսիի վերաքննիչ դատարանների նախկին նախագահ Վալերիան Ցերցվաձեն (նախկին դատավոր): Պատժամիջոցը տարածվում է նաև նրանց ընտանիքների անդամների վրա։
Վրաստանում ԱՄՆ այն ժամանակվա դեսպան Քելի Դեգնանը պարզաբանել է վրացի դատավորների նկատմամբ պատժամիջոցներ կիրառելու որոշման պատճառը: Դեգնանն այս հարցի վերաբերյալ տեսաուղերձում ասել էր, որ որոշումը հիմնված է հավաստի և համաձայնեցված տեղեկատվության վրա, որ այդ դատավորները «ներգրավված են եղել էական կոռուպցիոն գործունեության մեջ՝ պետական պաշտոնը չարաշահելու միջոցով»:
Վրաստանի վարչապետ Իրակլի Ղարիբաշվիլին հայտարարել է, որ երկրի դատական համակարգն օրինակելի է, և ինքը հպարտանում է դատական համակարգով ու դատավորներով: Ղարիբաշվիլիի հավաստմամբ` ինքնիշխան դատարանի նկատմամբ ցանկացած միջամտություն՝ լինի ներքին, թե օտարերկրյա, անթույլատրելի է: Վրաստանի արտաքին գործերի նախարար Իլիա Դարչիաշվիլին նամակով դիմել էր Միացյալ Նահանգների պետքարտուղար Էնթոնի Բլինքենին։ Նրա խոսքով` անհասկանալի և անընդունելի է դատավորների նկատմամբ պատժամիջոցներ կիրառելու մասին ԱՄՆ Պետդեպարտամենտի որոշումը։
Վրաց վերլուծաբաններն ԱՄՆ-ի այս որոշումը որակեցին «առաջին ծիծեռնակ»: Ավելին՝ այստեղ:
