Մեր ընտրությունը Եվրամիությանը Վրաստանի անդամակցումն է, ինչն իշխող կուսակցությունն արգելակում է, և անհնար է դարձնում վրաց ժողովրդի այս պատմական նկրտումների իրականացումը սեփական որոշումներով: Այս մասին նշված է Վրաստանի ամենաազդեցիկ ընդդիմադիր «Միացյալ ազգային շարժում» (ՄԱՇ) կուսակցության նախկին նախագահ Նիկա Մելիայի ու ընդդիմադիր «Մթավարի արխի» հեռուստաընկերության նախկին գլխավոր տնօրեն Նիկա Գվարամիայի նորաստեղծ «Ախալի» («Նոր») կուսակցության հայտարարության մեջ։
Կուսակցությունը պարզաբանում է, որ այս պատմական պահին փոփոխությունը պետք է դառնա յուրաքանչյուրի առաջնահերթությունը։ Նշվում է, որ այդ փոփոխությունը կհանգեցնի բազմակուսակցական ժողովրդավարական կառավարման, և Վրաստանը կդարձնի Եվրամիության լիիրավ անդամ, «ինչը մեզանից յուրաքանչյուրի համար նշանակում է բարգավաճում, անվտանգ միջավայր, երջանկության և խաղաղության ամուր և հավերժական երաշխիքներ»:
«2024 թվականի մարտի 22-ին Եվրահանձնաժողովի արտաքին և անվտանգության քաղաքականության խոսնակ Պիտեր Ստանոն ասաց, որ դատավորների ամբողջականության ստուգումը նախապայման է անդամակցության բանակցությունների մեկնարկի համար։
Կառավարության դեմ քայլ անելու փոխարեն Վրաստանի վարչապետը կրկին հայտարարեց, որ հարցը փակված է «Վրացական երազանքի» համար, և իշխող կուսակցությունը մտադիր չէ անհրաժեշտ բարեփոխումներ իրականացնել Եվրամիությանն անդամակցելու ճանապարհին։ Նաև այսօր դատավորների համաժողովում սանկցիայի ենթարկված դատական կլանը հերթով կրկնեց իշխող կուսակցության ապատեղեկատվական հաղորդագրությունները՝ Եվրահանձնաժողովի որոշած բարեփոխումները վարկաբեկելու նպատակով։ Սա նշանակում է բացահայտ մերժել վրաց ժողովրդի եվրոպական ընտրությունը»,- նշված է հայտարարության մեջ:
Ըստ «Ախալի»-ի հայտարարության՝ Եվրամիությունը քաղաքակրթական միասնություն է՝ հիմնված արժեքների, պարտականությունների և պարտավորությունների վրա. «Ի տարբերություն Ռուսաստանի, նա մյուս պետություններին ընկալում է որպես իրավահավասար գործընկեր և հարգում է մարդկանց ընտրությունը։ Մեր ընտրությունը Վրաստանի անդամակցությունն է Եվրամիությանը, ինչին իշխող կուսակցությունը արգելակում է, և անհնար է դարձնում վրաց ժողովրդի այս պատմական նկրտումների իրականացումը սեփական որոշումներով»:
Ի դեպ, մարտի 11-ին Վրաստանի ամենաազդեցիկ ընդդիմադիր «Միացյալ ազգային շարժում» (ՄԱՇ) կուսակցության նախկին նախագահ Նիկա Մելիան ու ընդդիմադիր «Մթավարի արխի» հեռուստաընկերության նախկին գլխավոր տնօրեն Նիկա Գվարամիան ստեղծել են «Ախալի» («Նոր») կուսակցությունը։
