Մարտի 21-ին Վրաստանում նշվում է լրագրության օրը։ Վրաստանի լրագրողների ֆեդերացիան և Թբիլիսիի պետական համալսարանը մասնագիտական օրը համատեղ սահմանել են 1993 թվականին:
Տարեթիվը կապված է վրացական առաջին թերթի հիմնադրման հետ, որը սկզբում կոչվել է «Վրաստանի թերթ», իսկ ավելի ուշ՝ «Վրացական թերթ»։ «Վրաստանի թերթ»-ի առաջին համարը հին ոճով լույս է տեսել 1819 թվականի մարտի 8-ին, իսկ նոր ոճով՝ մարտի 21-ին։
Վրաստանի վարչապետ Իրակլի Կոբախիձեն շնորհավորական ուղերձ է հղել լրագրողներին և լրատվամիջոցների բոլոր աշխատակիցներին վրացական լրագրության օրվա առթիվ ։
«Շնորհավորում եմ լրագրողներին վրացական լրագրության օրվա առթիվ։ Վրացական լրագրությունն ավելի քան հարյուր տարի է գրում է իր պատմությունը, և սա շատ արժեքավոր փորձ է։ Առանձնահատուկ է Ձեր դերը հանրության իրազեկման գործընթացում։ Ազատ մամուլը և անկախ լրագրությունը կարևոր ձեռքբերում են, որը միշտ մեր պաշտպանության և հոգածության ներքո է լինելու։ Եվս մեկ անգամ շնորհավորում ենք մասնագիտական օրվա առթիվ: Մաղթում ենք ձեզ հանրային վստահության բարձր մակարդակ և հաջողություններ»,- նշված է Կոբախիձեի ուղերձում:
Այս համատեքստում հարկ է նշել, որ Transparency International Georgia (TI) հասարակական կազմակերպության զեկույցի համաձայն, Վրաստանում 2023 թվականին լրագրողների նկատմամբ բռնության 45 դեպք է գրանցվել:
