Վրաստանի կրթության և գիտության նախարարությունն ամեն տարի պարգևատրում է լավագույն առաջադիմություն ցուցաբերած աշակերտներին ոսկե կամ արծաթե մեդալներով։ 2022 թվականի շրջանավարտների մեդալները Վրաստանի շատ մունիցիպալիտետներում արդեն հանձնվել են։ Առաջին հերթին հիմնականում մեդալները հանձնվում են մայրաքաղաք Թբիլիսիի դպրոցների աշակերտներին։

Թբիլիսիի թիվ 104 հայկական դպրոցի շրջանավարտ, այժմ արդեն Թբիլիսիի պետական համալսարանի հումանիտար գիտությունների ֆակուլտետի ուսանողուհի Աննա Թորոսյանը, որ ոսկե մեդալով է ավարտել դպրոցը, նշում է՝ սա իր առաջին փոքր, բայց մեծ հաջողությունն է, դպրոցական տարիների աշխատասիրության արդյունքն ու լավագույն հուշը:

«Ոսկե մեդալը, իհարկե, շատ կարևոր է, բայց այնքան նշանակալի չէ նրա «ոսկե» լինելու փաստը, քան այն, որ դա պատասխանն է 12 տարիների հեշտ ու դժվար օրերի: Բացի այդ, կուզեի նաև նշել, որ այն բավական մեծ նշանակություն ուներ ծնողներիս ու հարազատներիս համար: Չկա ավելի մեծ բավականություն, քան այն, երբ տեսնում ես, թե ինչպես են ծնողներդ հպարտանում քեզանով»։

Ծալկայի շրջանի Խաչգյուղի հանրային դպրոցի շրջանավարտ Խչոյան Մարինան ևս ոսկե մեդալակիր է, այժմ սովորում է Թբիլիսիի Պետական համալսարանի ծրագրավորման և կիրառական մաթեմատիկայի բաժնի առաջի կուրսում․

«Իհարկե, նման պարգևի արժանանալը մեծ պատիվ է, մոտիվացիա՝ նոր ձեռքբերումների և հաղթանակների լավագույն մեկնարկ, բայց, նախևառաջ այն նաև մեծ պատասխանատվություն է սահմանածդ բարձր նշաձողը պահպանելու համար: Մեդալն ինքնին հավաստումն է ցուցաբերած բարձր առաջադիմության և քրտնաջան աշխատանքի, ինչն, իհարկե, լավագույն խթանն է հետագայում նոր հաղթանակներ կերտելու համար»։

Մարինայի կարծիքով՝ ոսկե մեդալը ևս վկան և հավաստիքն է նաև այնպիսի որակների, ինչպիսիք են նպատակասլացությունը, չնահանջելու, թևաթափ չլինելու, ինքնակրթվելու կարողությունը, ուստի նա աշակերտներին խորհուրդ է տալիս ուսումնառության տարիներին և առհասարակ ձեռք բերել միայն մնայուն, հիմնավոր գիտելիքներ։

Մեկ այլ ոսկե մեդալակիր, Նինոծմինդայի թիվ մեկ հանրային դպրոցի շրջանավարտ, իսկ այժմ Իլիայի պետական համալսարանի բիզնես կառավարման ֆակուլտետի առաջին կուրսի ուսանողի Եվգինե Ղարսլյանը նշում է՝ հաճելի է, երբ դպրոցական տարիներին գիտելիքից բացի նաև նման խրախուսական պարգև ես ստանում։

«Շատերի համար կարող է սա հասանելի պարգև թվալ, բայց իմ դպրոցի օրինակով կասեմ, որ մեդալի միայն շատ աշխատանք ցուցաբերած աշակերտներն են արժանանում, և իմ մեդալը ևս ձևական բնույթ չի կրում։ Ինձ համար շատ կարևոր է եղել առաջին հերթին գիտելիքը, հետո նոր մեդալը կամ այլ պարգևներ, քանի որ գիտելիքը միշտ մնայուն է։

Կարծում եմ բոլոր աշակերտների համար առաջնային նպատակը դա պետք է լինի, իսկ ջանքերը անպայման կգնահատվեն, և այո, աշակերտները, ովքեր ցանկանում են ևս արժանանալ ոսկե մեդալի, հետո նաև դրամաշնորհի համալսարանում, պետք է չսահմանափակվեն միայն դպրոցով և առավելագույնը ներդնեն», — ասում է Եվգինեն։

Նշենք, որ խրախուսական ծրագիրը գործում է 2009 թվականից և հաշվի են առնվում 10-րդ, 11-րդ և 12-րդ դասարանների գնահատականները։ Աշակերտը ստանում է ոսկե մեդալ, եթե տարեկան գնահատականը (միջին թվաբանական)՝ առանց կլորացնելու (X-XII դասարաններում) 10 է։ Աշակերտը ստանում է արծաթե մեդալ, եթե՝ տարեկան գնահատականը 9,8 և ավելի է։

Աշակերտը չի ստանում ոսկե կամ արծաթե մեդալ, եթե ուսումնական ծրագիրը հաղթահարել է էքստեռնատի ձևով։