Վրաստանում բարձր մակարդակի կոռուպցիան մարտահրավեր է մնում: Այս տեղեկությունը նշված է «Թրանսփարենսի Ինթերնեշնլ-Վրաստան» (TI) հասարակական կազմակերպության (ՀԿ) տարածած հաղորդագրության մեջ:
TI-ը վրացական իշխանություններին կոչ է անում Եվրահանձնաժողովի պահանջների հիման վրա սկսել և ավարտել բարձր մակարդակի կոռուպցիոն դեպքերի հետաքննությունը, ապահովել հակակոռուպցիոն բյուրոյի անկախությունը, անաչառությունը և արդյունավետությունը, կատարել Բյուրոյի վերաբերյալ Վենետիկի հանձնաժողովի առաջարկությունները, մշակել և հաստատել հակակոռուպցիոն ռազմավարություն և գործողությունների ծրագիր, ապահովել դրա լիարժեք իրականացումը իրատեսական ժամկետներում՝ համապատասխան ֆինանսավորմամբ ու մոնիտորինգով և այլն:
«Դեկտեմբերի 9-ը կոռուպցիայի դեմ պայքարի միջազգային օրն է։ Վրաստանն ամբողջ աշխարհում հայտնի է տարիներ առաջ իրականացրած հակակոռուպցիոն հաջող բարեփոխումներով։ Արդյունքում Վրաստանում վերացվել է ցածր մակարդակի կոռուպցիան։ Այնուամենայնիվ, Վրաստանում բարձր մակարդակի կոռուպցիան մարտահրավեր է մնում։
Ափսոս, որ կոնկրետ հակակոռուպցիոն բարեփոխումների իրականացմամբ հնարավոր չեղավ ստեղծել այնպիսի հակակոռուպցիոն համակարգ, որն արդյունավետորեն կզբաղվեր էլիտար կոռուպցիայի դեմ։ Հակակոռուպցիոն հզոր համակարգի ստեղծումը հատկապես կարևոր է մի երկրի համար, որտեղ ավելի ու ավելի շատ հարցեր են առաջանում պետական գրավման և կլեպտոկրատիայի վերաբերյալ»,- նշել է ՀԿ-ն:
Ըստ նրանց՝ այս տարի Վրաստանը սպասում է Եվրոպական խորհրդի որոշմանը անդամակցության թեկնածուի կարգավիճակ ստանալու վերաբերյալ։ Վրաստանում հակակոռուպցիոն բարեփոխումներ իրականացնելու անհրաժեշտությունը քննարկվում է ինչպես Եվրահանձնաժողովի կողմից որպես 2022 թվականի հունիսին կարգավիճակ ստանալու նախապայման նշած 12 առաջնահերթություններում, այնպես էլ 2023 թվականի նոյեմբերին մշակված առաջարկություններում։
Եվրահանձնաժողովի կողմից պատրաստված հանձնարարականների կատարումն անհրաժեշտ է Եվրամիության հետ անդամակցության շուրջ բանակցություններ սկսելու համար։ Բացի այդ, ՀԿ-ն կարծում է, որ Եվրոպական հանձնաժողովի կողմից տրված հանձնարարականների իրականացումը լավագույն միջոցն ու հնարավորությունն է՝ երկրում կոռուպցիայի դեմ իրական քայլեր ձեռնարկելու համար։
