Վրաստանը կարող է վստահ լինել, որ Եվրամիությունը կկանգնի Վրաստանի կողքին, Մարդու իրավունքների օրվա առթիվ շնորհավորելով Վրաստանին, ասել է, Վրաստանում Եվրամիության դեսպան Պավել Հերչինսկին:
Վրաստանում ԵՄ գրասենյակի տարածած հայտարարության մեջ գրված է, որ Վրաստանը կարող է հույս դնել Եվրամիության աջակցության վրա:
«Մարդու իրավունքների պաշտպանությունը Եվրամիության հիմքն է։ Այս տեսլականն իրականություն դարձնելու ջանքերը ԵՄ ընդլայնման գործընթացի մի մասն են և այն ինը քայլերից մեկը, որը պետք է անի Վրաստանը ԵՄ անդամակցության ճանապարհին:
Վրաստանին թեկնածուի կարգավիճակ տրամադրելու հանձնարարականը պատմական է: Դրա հետ մեկտեղ գալիս է մարդու իրավունքների պաշտպանությունը բարելավելու պատասխանատվությունը: Դուք կարող եք հույս դնել, որ Եվրամիությունը կկանգնի ձեր կողքին՝ ձեր հիմնարար իրավունքները պաշտպանելու համար»,- ասված է հայտարարության մեջ։
Ի դեպ, դեկտեմբերի 10-ը՝ Մարդու իրավունքների օրը, ամբողջ աշխարհում նշվում է 1948 թվականից։ Այս օրը ՄԱԿ-ի Գլխավոր ասամբլեան ընդունեց Մարդու իրավունքների միջազգային հռչակագիրը։ Հռչակագիրը վերաբերում է ինչպես քաղաքացիական, այնպես էլ քաղաքական, ինչպես նաև տնտեսական, սոցիալական և մշակութային իրավունքներին։
Նոյեմբերի 8-ին Եվրահանձնաժողովի նախագահ Ուրսուլա ֆոն դեր Լեյենը հայտարարեց, որ Եվրահանձնաժողովը հանձնարարական կներկայացնի Վրաստանին ԵՄ անդամակցության թեկնածուի կարգավիճակ տրամադրելու վերաբերյալ։ Սակայն Եվրահանձնաժողովն այս որոշումն ընդունում է վերապահումով, որ երկիրը քայլեր ձեռնարկի ինը խնդրի ուղղությամբ։
Եվրահանձնաժողովը Վրաստանի համար սահմանել է ինը նախապայման: Վրաստանի համար սահմանված ինը նախապայմաններից մի քանիսը 2022 թվականի հունիսին Եվրահանձնաժողովի հրապարակած 12 հանձնարարականների շարունակությունն են, մինչդեռ որոշ հանձնարարականներ լիովին նոր են։ 9-ը նախապայմանների մասին կարդացեք այստեղ:
Նոր վերապահում է ԵՄ-ի և նրա արժեքների վերաբերյալ ապատեղեկատվության և օտարերկրյա տեղեկատվական մանիպուլյացիայի դեմ պայքարը։ Եվրահանձնաժողովը նաև ուշադրություն է հրավիրում Վրաստանի կողմից Եվրամիությանն իր արտաքին և անվտանգության քաղաքականությունը մոտեցնելու անհրաժեշտության վրա։ Ներկայում Վրաստանի՝ Եվրամիության արտաքին և անվտանգության քաղաքականությանը համապատասխանելու ցուցանիշը կազմում է մոտ 43 տոկոս, իսկ մի քանի տարի առաջ գերազանցում էր 60 տոկոսը։
Եվրահանձնաժողովի հանձնարարականից հետո Եվրոպական խորհուրդը՝ 27 անդամ երկրներ, վերջնական որոշումը կկայացնի դեկտեմբերի 14-15-ին։ ԵՄ անդամ բոլոր 27 երկրները պետք է աջակցեն այս հանձնարարականին։
Եվրահանձնաժողովը կանաչ լույս է տվել Ուկրաինային և Մոլդովային՝ սկսելու ԵՄ անդամակցության բանակցությունները, ինչը ԵՄ անդամակցության թեկնածուի կարգավիճակի հարցում հաջորդ քայլն է:
ԵՄ թեկնածուի կարգավիճակի սպասումով. Թբիլիսիում ակնկալիքներ ունեն
https://www.aliq.ge/yem-theknatcui-kargavitchaki-spasumov-thbilisium-aknkalikhner-unen/
