«Ժողովրդավարության հետազոտական ինստիտուտ» (DRI) հասարակական կազմակերպությունը (ՀԿ) հայտնում է երեք շաբաթ առաջ Անակլիայից 4 կիլոմետր հեռավորության վրա սկսված լայնածավալ աշխատանքների մասին:
Ըստ DRI-ի՝ Վրաստանից չվերահսկվող Օչամչիրրեի ռուսական ռազմածովային նավատորմի բնականոն գործունեությունը ապահովելու համար նախապատրաստական աշխատանքներ են տարվում օկուպացված Աբխազիայի Փիչոր գյուղի մոտ: Այս գյուղը գտնվում է Գալիի շրջանի ցածրադիր հատվածում։
DRI-ը հրապարակել է տեղական կոնտակտային անձանց կողմից տրամադրված զեկույցները, ըստ որոնց՝
- ռուս զինվորականները, զրուցելով տեղի բնակիչների հետ, ասում են, որ Փիչորը Օչամչիրեի մեծ ռազմածովային բազայի համար օժանդակ գործառույթ է ունենալու,
- ռազմաբազայի շինարարությունը սկսվել է,
- ռուսներն ընթացիկ ժամանակահատվածում ակտիվ վարժանքներ են անցկացնում, որոնց ընթացքում Օչամչիրեի ռազմական նավահանգստում կիրառվել է անօդաչու թռչող սարքի հարձակման իմիտացիա,
- Օչամչիրրի բնակիչների խոսքով, տեղում ակտիվորեն ընթանում է ռադիոէլեկտրոնային պատերազմի համակարգերի տեղակայման գործընթաց, որոնք, հավանաբար, կօգտագործվեն ուկրաինական անօդաչու թռչող սարքերի և հրթիռների դեմ։
DRI-ի գնահատմամբ՝ Վրաստանի կառավարության պատասխանը՝ Վրաստանի կենտրոնական իշխանությունների կողմից վերահսկվող տարածքից չորս կիլոմետր հեռավորության վրա գտնվող ռուսական ռազմածովային բազայի տեղակայման վերաբերյալ, անբավարար է և հետևաբար՝ անարդյունավետ այս փուլում։
Ի դեպ, Վրաստանից չվերահսկվող Աբխազիայի դե ֆակտո նախագահ Ասլան Բժանիան հայտարարել է, որ Օչամչիրե քաղաքում ռուսական ռազմածովային մշտական բազա կստեղծվի:
Վրաստանի արտաքին գործերի նախարարությունն (ԱԳՆ) իր մտահոգությունն է հայտնում Վրաստանից չվերահսկվող Աբխազիայի Օչամչիրե քաղաքում ռուսական ռազմածովային նավատորմի բազան տեղակայելու հեռանկարի առնչությամբ։ ԱԳՆ-ն նշում է՝ նմանատիպ գործողությունները «հերթական սադրիչ փորձն են՝ ուղղված Աբխազիայի և Ցխինվալիի շրջանների անօրինական օկուպացիայի օրինականացմանը»։
Վրաստանի քաղհասարակությունը և վերլուծաբանները Մոսկվայի այս քայլը քննադատել են: Ըստ նրանց՝ ռուսական սևծովյան նավատորմը և նրա ենթակառուցվածքը ուկրաինացիների հարվածների պատճառով լքում են Ղրիմը և տեղափոխվում Վրաստան, և նրանք կտեղակայվեն Վրաստանից չվերահսկվող Գուդաութայում, Սոխումիում և Օչամչիրեում:
