Վրաստանում գործող ռուսամետ «Պահպանողական շարժում» կուսակցության առաջնորդներից, «Ալտ-ինֆո» քարոզչական լրատվամիջոցի առաջնորդ Զուրաբ Մախարաձեն Թբիլիսիի ոստիկանության գլխավոր վարչությունում մի քանի ժամ հարցաքննվել է, գրում է RadioTavisupleba-ն:
Վրաստանի ներքին գործերի նախարարությունից չեն հստակեցրել, թե որ գործի շրջանակներում է Մախարաձեն հարցաքննվել:
Մախարաձեն թե՛ ոստիկանության շենք մտնելուց առաջ, թե՛ դրանից դուրս գալուց հետո նշել է, որ իրեն ոստիկանություն են հրավիրել «հակամայդանի» մասին արված հայտարարությունների պատճառով։ Նրա խոսքով, մի քանի հասարակական կազմակերպություններ խնդրել են ոստիկանությանը հետաքննել այս հայտարարությունները։
Ի դեպ, Վրաստանի «Ժողովրդավարության հետազոտական ինստիտուտը» դիմել է ոստիկանություն՝ «Պահպանողական շարժման» առաջնորդների հրապարակային դիմումները հետաքննելու խնդրանքով։ Կազմակերպության ղեկավար Ուչա Նանուաշվիլին կարծում է, որ բացի հրապարակային հայտարարություններից, քննչական մարմինները պետք է հետաքրքրվեն նաև «բռնի խմբերի ֆինանսավորման աղբյուրներով»։
Նշենք նաև, որ «Պահպանողական շարժման» անդամները վերջին ամիսներին մի քանի անգամ սպառնացել են «հակամայդան» կազմակերպել. նրանք առաջին նման հայտարարությունն արել են հուլիսին՝ «Թբիլիսի Փրայդ»-ի կազմակերպած փառատոնից հետո։ Սեպտեմբերի 22-ին «Ալտ-Ինֆո»-ի ղեկավարները հայտարարեցին, որ ստեղծվում է «Հակամայդանական շարժում»՝ «Վրաստանում արևմտամետ խմբավորումների կազմակերպած պետական հեղաշրջումը և Մայդանը կանխելու համար»։
