Օկուպացիան Ռուսաստանի համար տարածաշրջանը մշտապես ապակայունացնելու գործիք է, Միջխորհրդարանական միության (IPU) նստաշրջանում լրագրողների հետ զրույցում հայտարարել է Վրաստանի խորհրդարանի նախագահ Շալվա Պապուաշվիլին:
Ըստ նրա՝ IPU-ի 147-րդ նստաշրջանին մասնակցող երկրները հակված են աջակցելու Վրաստանի օկուպացված շրջաններից ներքին տեղահանվածների վերաբերյալ բանաձևին։
«Մի կողմից ուզում եմ շնորհակալություն հայտնել իմ գործընկերներին, իսկ մյուս կողմից կոչ եմ անում շարունակել այս աջակցությունը։ Բացի այդ, ես խոսել եմ այն մարտահրավերների մասին, որոնք առկա են այսօրվա աշխարհում անվտանգության տեսանկյունից՝ հատկապես մեր տարածաշրջանում։ Օկուպացիան Ռուսաստանի համար տարածաշրջանը մշտապես ապակայունացնելու գործիք է: Իհարկե, սա մարտահրավեր է ոչ միայն Վրաստանի, այլև տարածաշրջանի ու համաշխարհային անվտանգության համար, երբ Ռուսաստանը օկուպացված տարածքների միջոցով կարող է տարբեր տեսակի լարվածություն մտցնել երկրում ու ողջ տարածաշրջանում»,- ասել է Պապուաշվիլին:
