Վրաստանում ծնողները բողոքում են վնասակար մթերքի վաճառքի դեմ և պահանջում են դպրոցներում սննդի տրամադրման ծրագիր ներդնել։ Այս հայտարարությունը տարածել է «Ծնողները կրթության համար» հասարակական կազմակերպությունը (ՀԿ)։
ՀԿ-ի տվյալներով, ներկայումս ստորագրահավաք է իրականացվում կրթության նախարարություն ներկայացնելու համար։ Ըստ այս պահի տվյալների՝ նախաձեռնությունն արդեն ունի 7 000 աջակից: Ստորագրել հնարավոր է հետևյալ հղումով։
«Անառողջ սննդի վաճառքը բուֆետներում պետք է անհապաղ դադարեցվի, իսկ դպրոցներում ներդրվի առողջ սննդի ծրագիր»,- նշված է հայտարարության մեջ:
Ստորագրահավաքի հիմնավորումն այն է, որ երեխաների մեծ մասը հիմնականում դասերի է հաճախում քաղցած, ինչը նվազեցնում է ուսանողների ուսման որակը և վտանգում նրանց առողջությունն ու զարգացումը։ Դրանից զատ, դպրոցներում չկա կերակրման ծրագիր, չկան հատուկ սննդի ժամ և հիգիենիկ տարածք, որտեղ երեխաները կարող են ուտել տնից բերած սնունդը:
Ստորագրողները պահանջում են.
- այն դպրոցներում, որտեղ գործում է բուֆետ, անհապաղ դադարեցնել առողջության համար վնասակար սննդի վաճառքը,
- պարենի ազգային գործակալությունը պարբերաբար ստուգի բուֆետներում վաճառվող ապրանքների կազմն ու որակը,
- կրթության նախարարությունն արագացված կարգով իրականացնի դպրոցական առողջ սննդի ծրագիր, թափանցիկ դարձնի աշխատանքային գործընթացը և տեղեկացնի, թե պետությունն ինչ է անելու այս ուղղությամբ:
