Վրաստանի խորհրդարանի Հազվագյուտ հիվանդությունների խնդիրը համակարգող խորհրդի անդամների խոսքով՝ ախոնդրոպլազիայով հիվանդ երեխաներից մի քանիսն աշնանը կսկսեն բուժվել անհրաժեշտ դեղամիջոցներով։
Այսօր Հիվանդությունների վերահսկման ազգային կենտրոնում [NCDC] հանդիպել են խորհրդի անդամներն ու և ծնողները։
«Բյուջե ու միջոցներ կան, այս դեղը մեզ կհասնի աշնանը։ Բազմամասնագիտական խմբի ընտրած առաջին 5-6 երեխաներն այս տարի դեղորայք կստանան»,- հանդիպումից հետո ասել է Առողջապահության խորհրդարանական հանձնաժողովի նախագահ Զազա Լոմինաձեն։
Առաջին փուլում երեխաները դեղը կստանան Իաշվիլիի մանկական կլինիկայում։ Ըստ ծնողների` 2-3 ամսից բուժվող երեխաների թիվը կավելանա։
Նշենք, որ ախոնդրոպլազիա ախտորոշմամբ երեխաների ծնողներն արդեն տասնյակ ակցիաներ են անցկացրել՝ պահանջելով իրենց երեխաների համար կենսական նշանակություն ունեցող դեղամիջոցը ներմուծել։
Ծնողներն ասում են, որ դեղամիջոցը հաստատել են ԱՄՆ Սննդամթերքի և դեղերի վարչությունը (FDA) և Եվրոպական դեղամիջոցների գործակալությունը (EMA) 2021 թվականին, և դա առաջին դեղամիջոցն է, որն օգտագործվում է ախոնդրոպլազիայի և դրա հետևանքով առաջացած ախտանիշների բուժման համար:
Ի դեպ, արդեն մեկ տարուց ավելի էր, ինչ ախոնդրոպլազիա ախտորոշմամբ երեխաների մայրերը խնդրում էին կառավարությունից` ներդնել ու ֆինանսավորել VOXZOGO դեղամիջոցը։ Ծնողների պնդմամբ` այդ դեղամիջոցը կենսական նշանակություն ունի ախոնդրոպլազիայի ախտորոշմամբ երեխաների համար և արդյունավետ է միայն մինչև 14-16 տարեկանը:
