Չնայած բազմաթիվ բողոքների և Ռուսաստանի հետ ուղիղ չվերթների վերականգնման չեղարկման պահանջին՝ ՌԴ-Վրաստան օդային փոխադրումներն էլ ավելի են ակտիվանում:
«Ռուսական փոստը» դիտարկում է դեպի Վրաստան ուղիղ ավիաառաքման հնարավորությունը, գրում է Netgazeti-ին՝ հենվելով ընկերության տարածած տեղեկությանը:
«Մի քանի ավիաընկերությունների կայուն թռիչքների մեկնարկից հետո մենք շտապ կդիտարկենք փոստի ուղիղ օդային փոխադրման հնարավորությունը դեպի Վրաստան», — նշել են «Ռուսական փոստ»-ից:
Ընկերության տվյալներով՝ այժմ օդային փոստը Վրաստան է ուղարկվում երրորդ երկրների միջոցով։
Ի դեպ, մայիսի 14-ին քաղաքացիները ստորագրահավաք են սկսել Ռուսաստանի և Վրաստանի միջև ուղիղ չվերթերի վերականգնման դեմ:
Վրաստանի քաղաքացիական ավիացիայի գործակալության տվյալներով՝ ռուսական Azimuth Airlines-ը սկսում է թռիչքները Վրաստանի և Ռուսաստանի միջև։ Մոսկվա-Թբիլիսի-Մոսկվա չվերթը կիրականացվի մայիսի 17-ից՝ շաբաթական յոթ անգամ։
2023 թվականի մայիսի 10-ին ՌԴ նախագահ Վլադիմիր Պուտինը 2 հրամանագիր արձակեց, որով մայիսի 15-ից չեղյալ համարեց Վրաստանի քաղաքացիների համար 2000 թվականից գործող վիզային ռեժիմը և չեղարկեց երկու երկրների միջև ուղիղ չվերթերի արգելքը, որը սահմանվել էր 2019 թվականից։
Ռուսաստանի որոշումը Թբիլիսիում միանշանակ չընդունվեց. իշխող կուսակցության առաջնորդները և կառավարության ներկայացուցիչները ողջունել են այդ որոշումը, մինչդեռ ընդդիմության և մեծ թվով փորձագետների պնդմամբ` Պուտինը նման կերպ «պարգևատրել է» Վրաստանի կառավարությանը։
Որոշ փորձագետներ կարծում են, որ Ռուսաստանի որոշումը սպառնալիք է Վրաստանի՝ Եվրամիությանն ինտեգրվելու համար և կխանգարի Վրաստանին դառնալ ԵՄ անդամության թեկնածու երկիր։
Նախագահ Սալոմե Զուրաբիշվիլին Ռուսաստանի որոշումները սադրանք է անվանել և կառավարությանը կոչ է արել Ռուսաստանի քաղաքացիների համար եռամսյա վիզային ռեժիմ սահմանել։
