Վրաստանի նախագահ Սալոմե Զուրաբիշվիլին իր ամենամյա զեկույցում կոշտ քննադատություններ է հնչեցրել երկրի իշխանությունների հասցեին։ Խորհրդարանում ներկա էին վարչապետ Իրակլի Ղարիբաշվիլին և կառավարության այլ ներկայացուցիչներ։

Նախագահն իր զեկույցը սկսել է Ուկրաինային համերաշխություն հայտնելով: Դառնալով վրաստանյան հարցերին՝ նա կոշտ քննադատության է ենթարկել իշխանություններին՝ հռետորական հարցադրմամբ. «Որտե՞ղ եք կանգնած, ինչո՞ւ եք հեռացել ժողովրդի կամքից և նրանից ստացած մանդատից»: Նախագահը վերհիշելով 2012-ից մինչ օրս տեղի ունեցած իրադարձությունները՝ նշել է, թե «Վրացական երազանք»-ը  կամաց-կամաց «գունափոխություն» է սկսել։

Զուրաբիշվիլին նաև դիմել է խորհրդարանի անդամներին՝ նշելով, որ մի շարք օրենսդրական նախաձեռնություններ և փոփոխություններ, որոնք հապճեպ ընդունվել են, ծառայում են միայն «իշխանության համախմբմանը»:

Դիմելով կառավարությանը, Զուրաբիշվիլին նշել է. «Մենք վախենում ենք չգրգռել Ռուսաստանին, ինչը միգուցե հասկանալի է, բայց անհասկանալի է, թե ինչու նույն քաղաքավարությամբ և ակնածանքով չենք հոգում մեր ընկերների և գործընկերների մասին»:

Ըստ նախագահի՝ Ուկրաինային սատարող Վրաստանի իշխանությունը ոչ դիվանագիտություն, ոչ խելամտություն, ոչ պատմական համերաշխություն չի ցուցաբերել. «Այո, մենք միանում ենք ՄԱԿ-ի բանաձևերին, բայց խուսափում ենք բարոյական և քաղաքական համերաշխությունը ի ցույց դնելուց»:

Զուրաբիշվիլին նաև ընդգծել է՝ որքան էլ իշխանությունը փորձի ապացուցել, թե Եվրոպայի և Վրաստանի ազգային շահերը հակասում են միմյանց, միևնույնն է՝ «իրականությունից չեն կարող փախչել»:

«Եթե նայենք եվրոպական հանձնարարականներին, այստեղ մեզ խորթ ոչինչ չկա, օտարման վտանգ չկա, ընդհակառակը, դա մեր ավանդական արժեքների արձագանքն է։ Դատական ​​բարեփոխումների եվրոպական պահանջը և արդարադատության մեր ավանդույթը: Եվրամիությունը Վրաստանում ուղղակիորեն ծառայում է մեր երկրի խաղաղությանը` ի դեմս ԵՄ-ի դիտորդական առաքելության»,- ասել է նախագահը:

Զուրաբիշվիլին խոսել է «երկրորդ ճակատի» դավադրության տեսությունների մասին և նշել, որ Թբիլիսին և Մոսկվան այս թեմայով խոսում են նույն լեզվով.

«Ինչպես էլ փորձեք տարածել երկրորդ ճակատի այս դավադրության տեսությունները, վրաց ժողովուրդը լավ գիտի, որ Եվրամիության ստեղծման գաղափարը ծառայում է խաղաղությանը, ոչ թե պատերազմին»:

Զուրաբիշվիլիի խոսքով, երկիրը պետք է պարզեցնի քաղաքացիության ձեռքբերումը ներգաղթյալների, օկուպացված տարածքներում բնակվողների և արդեն նաև Ռուսաստանից վերադարձածների համար։

Խոսելով ԵՄ-ի 12 հանձնարարականների մասին, նախագահը նշել է՝ կարգավիճակ ստանալու համար անհրաժեշտ է ամբողջական համախմբում. «Ես մտադիր եմ լիովին օգտագործել իմ հնարավորությունները՝ պաշտպանելու և կատարելու ժողովրդի կամքը։ Սա պահանջում է երկրի ամբողջական համախմբում և միավորում»:

Նախագահն ընդգծել է՝ իր նպատակն է Վրաստանն ամբողջովին ազատագրել խորհրդային և ռուսական ճնշումներից ու իրականացնել Վրաստանի եվրոպական դարավոր ձգտումը:

Զուրաբիշվիլին հայտարարել է, որ Եվրախորհրդարանի պատգամավորների առջև ելույթ կունենա 2023 թվականի ապրիլի 18-ին։