Վրաստանի նախագահ Սալոմե Զուրաբիշվիլին հայտարարել է, որ իշխող «Վրացական երազանք» կուսակցության ուղերձները հակասում են բոլոր գործընկեր երկրների ղեկավարների հայտարարություններին։
Զուրաբիշվիլին ասել է, որ Վրաստանի պարտվողականությունը (նկատի ունի պարտությունն առանց կռվի ընդունելը- խմբ.) համահունչ է միայն ռուսական նարատիվին։
«Օկուպացված տարածքների իշխանության մինչ այժմ արտահայտած որոշակի զգուշավորությունը հասկանալի է բոլորին, որը համահունչ է միայն ռուսական քարոզչությանը: Այսօրվա իրավիճակը բոլորովին այլ է»,- ասել է նախագահը:
Ի դեպ, իշխող կուսակցության նախագահ Իրակլի Կոբախիձեն փետրվարի 9-ին լրագրողների հետ զրույցում կրկին անդրադարձել է երկրորդ ճակատ բացելու մասին հայտարարություններին։ Նրա խոսքով, չնայած Վրաստանի ռազմական ռեսուրսներին, իրենք դա չեն անի, և «ոչ ոք չի կործանի երկիրը»՝ «իրավիճակը Ռուսաստանում վատթարացնելու համար»։
«Կա կոնկրետ շահագրգռվածություն երկրորդ ճակատ բացելու առումով, որպեսզի Ռուսաստանի համար առաջին ճակատում իրավիճակը սրվի. մենք ունենք 25 հազար լավ պատրաստված զինվոր, ունենք մոտ հարյուր տանկ, 2 մարտական ինքնաթիռ և այլն։
Կան որոշակի ռեսուրսներ, որպեսզի մենք կարողանանք վատթարացնել իրավիճակը Ռուսաստանի համար, բայց դա, ի վերջո, կլինի Վրաստանը կործանելու գնով։ Մեր շահերից է բխում երկիրը չքանդելը, ուստի այս շահին հետևելու ենք մինչև վերջ»,- ասել է Կոբախիձեն:
